გიორგი სიგუა კიევის მეორე საერთაშორისო ტურისტულ კონფერენციაზე წარადგენს მოხსენებას გამაჯანსაღებელი ტურიზმის შესახებ

საქართველოს დელეგაცია კიევის მეორე საერთაშორისო ტურისტულ ფორუმში მიიღებს მონაწილეობას.

ტურიზმის ეროვნული ადმინისტრაციის ცნობით, ქართული დელეგაცია უკრაინაში ვიცე-პრემიერ კახი კალაძის ხელმძღვანელობით გაემგზავრება. ღონისძიებას ტურიზმის ეროვნული ადმინისტრაციის ხელმძღვანელი გიორგი სიგუაც დაესწრება.

ფორუმის ოფიციალურ გახსნაზე მისასალმებელი სიტყვით გამოვლენ უკრაინის ვიცე-პრემიერი ალექსანდრე ვილკული, საქართველოს ენერგეტიკის მინისტრი და ვიცე-პრემიერი კახი კალაძე და გაერო-ს მსოფლიო ტურიზმის ორგანიზაციის გენერალური მდივანი ტალიბ რიფაი.

ტურიზმის ეროვნული ადმინისტრაციის ხელმძღვანელი გიორგი სიგუა კონფერენციაზე წარადგენს მოხსენებას გამაჯანსაღებელი ტურიზმის შესახებ, ასევე, მონაწილეობას მიიღებს შავი ზღვის ეკონომიკური თანამშრომლობის ორგანიზაციის BSEC-ის წევრი ქვეყნების ტურიზმზე პასუხისმგებელი მინისტრების დისკუსიაში.
სიგუა ფორუმის ფარგლებში დაგეგმილ სხვა ღონისძიებებსაც დაესწრება და მაღალი რანგის შეხვედრებს გამართავს.

კიევის მეორე საერთაშორისო ფორუმი 10-12 ოქტომბერს, უკრაინის ტურიზმისა და კურორტების სახელმწიფო სააგენტოს ორგანიზებით იმართება. ღონისძიებას მსოფლიო ტურიზმის ორგანიზაციის გენერალური მდივანი ტალებ რიფაიც დაესწრება.

10.10.13