კატარის საინვესტიციო კომპანიები საქართველოში სოფლის მეურნეობის მიმართულებით ინვესტივიების ჩადებით დაინტერესდნენ

საქართველოს დელეგაცია, საგარეო საქმეთა მინისტრის მაია ფანჯიკიძის ხელმძღვანელობით კატარის სახელმწიფოში იმყოფებოდა.

დელეგაცის წევრები იყვნენ საქართველოს სოფლის მეურნეობის მინისტრი შალვა ფიფია, ეროვნული საინვესტიციო სააგენტოს დირექტორი გიორგი პერტაია და საქართველოს თანადაფინანსების ფონდის აღმასრულებელი დირექტორი გიორგი ბაჩიაშვილი.

ვიზიტის ფარგლებში, შეხვედრები გაიმართა კატარის პრემიერ-მინისტრთან და შინაგან საქმეთა მინისტრთან შეიხ აბდულა ბინ ნასერ ბინ ხალიფა ალ თანისთან, კატარის საგარეო საქმეთა მინისტრის მოვალეობის შემსრულებელთან ალი ბინ ფაჰედ ალ ჰაჯირისთან და კატარის ფონდის პრეზიდენტთან საად ალ მოჰანადისთან.

,,გაიმართა შეხვედრები კატარის სახელმწიფო საინვესტიციო კომპანიების „კატარი დიარი”-ს, კომპანია „ჰასად ფუდი”-ს და კომპანია „მავაშის” ხელმძღვანელებთან, ასევე შევხვდით კატარის კერძო სექტორის წარმომადგენლებს. შეხვედრების მიზანს საქართველოში სოფლის მეურნეობის მიმართულებით კატარული ინვესტიციების მოზიდვა წარმოადგენდა“, – განაცხადა შალვა ფიფიამ.

შეხვედრებისას ხაზი გაესვა საქართველოსა და კატარის სახელმწიფოს შორის მზარდ ორმხრივ ურთიერთობებს სხვადასხვა მიმართულებებით და დაიგეგმა კონკრეტული ნაბიჯები მომავალი თანამშრომლობისთვის.

ოფიციალურ შეხვედრებზე საუბარი შეეხო ორ ქვეყანას შორის თანამშრომლობის განვითარების პერსპექტივებს პოლიტიკურ, სავაჭრო-ეკონომიკურ, კულტურულ და საგანმანათლებლო სფეროებში.

კატარის მხარემ მნიშვნელოვანი დაინტერესება გამოხატა საქართველოში ინვესტიციების განხორციელებით და მიიღო გადაწყვეტილება საქართველოში მოავლინოს დელეგაცია კონკრეტული შესაძლებლობების შესწავლის მიზნით.

შეხვედრებზე კატარის მხარემ კვლავ დააფიქსირა საქართველოს სუვერენიტეტისა და ტერიტორიული მთლიანობის ურყევი მხარდაჭერა.

15.10.13