სოფლის მეურნეობის სამინისტროს დელეგაცია 21-25 ოქტომბერს, მინისტრის შალვა ფიფიას ხელმძღვანელობით, ოფიციალური ვიზიტით ისრაელში იმყოფებოდა.
როგორც “თბილისი თაიმსს” სოფლის მეურნეობის სამინისტროდან აცნობეს, ვიზიტის ფარგლებში, საქართველოს სოფლის მეურნეობის მინისტრი, შალვა ფიფია ისრაელის სოფლის მეურნეობის მინისტრს, იაირ შამირს შეხვდა.
სამინისტროს ინფორმაციით, შალვა ფიფიამ დეტალურად ისაუბრა საქართველოს სოფლის მეურნეობის სამინისტროში მიმდინარე და განხორციელებულ პროექტებზე, ასევე იმ სიახლეებზე, რომლებიც დარგის განვითარების მიმართულებით ხორციელდება, მათ შორის, საქართველოში კოოპერაციების შექმნისკენ გადადგმულ ნაბიჯებზე.
უწყების ინფორმაციით, შეხვედრაზე განსაკუთრებული ყურადღება დაეთმო საქართველოს მუნიციპალიტეტებში რაიონული საინფორმაციო-საკონსულტაციო სამსახურების შექმნისა და ფუნქციონირების საკითხს.
“აღნიშნული სამსახურები ხელს უწყობს ადგილობრივი ფერმერების ინფორმირებულობის გაზრდას და მათ საქმიანობის ეფექტურობის ამაღლებას”, – აცხადებენ სამინისტროში.
მათივე ინფორმაციით, ისრაელის სოფლის მეურნეობის მინისტრმა დადებითად შეაფასა საქართველოს ხელისუფლების მიერ სოფლის მეურნეობის დარგის განვითარებისთვის გადადგმული ნაბიჯები და მომავალი თანამშრომლობისთვის მზადყოფნა გამოთქვა.
“მისასალმებელია ისრაელის სახელმწიფოს მხრიდან დარგის განვითრების მხარდაჭერა, რადგან მათ სოფლის მეურნეობის სხვადასხვა სექტორში წარმატებული პროექტების განხორციელების დიდი გამოცდილება აქვთ, განსაკუთრებით, თანამედროვე სასათბურე მეურნეობებისა და უახლესი ტექნოლოგიების დანერგვის მიმართულებით. მოხარულები ვიქნებით, აქტიურად ვითანამშრომლოთ ერთობლივი პროექტების განხორციელების მიზნით”,-განაცხადა შეხვედრის დასრულების შემდეგ შალვა ფიფიამ.
ისრაელში ოფიციალური ვიზიტის ფარგლებში შალვა ფიფია სოფლის მეურნეობის საერთაშორისო განვითარების ხელშეწყობის ცენტრის (CINADCO) ხელმძღვანელს, ომარ ზიდანსაც შეხვდა, რომელმაც საქართველოში საინფორმაციო-საკონსულტაციო სამსახურების თანამშრომელთა კვალიფიკაციის ამაღლების, ასევე, ქართველი ფერმერებისა და კოოპერატივების შექმნის მსურველთათვის ისრაელის სახელმწიფოს გამოცდილების გაზიარების მიმართულებით ერთობლივი პროექტების განახორციელების სურვილი გამოთქვა.
ვიზიტის ფარგლებში, შალვა ფიფიამ შეხვედრა გამართა ისრაელის ექსპორტის ინსტიტუტის აღმასრულებელ დირექტორთან, ოფერ ზაკთან, რომელიც საქართველოს საექსპორტო პოტენციალით დაინტერესდა.
შალვა ფიფიამ ისრაელში ყოფნისას საირიგაციო უახლესი ტექნოლოგიების NA’AN DAN JAIN სისტემები დაათვალიერა – მათ შორის, წვეთოვანი რწყვის სისტემები, რომლის დანერგვის უდიდესი გამოცდილებაც ისრაელის სახელმწიფოს გააჩნია.
ვიზიტის დასასრულს, შალვა ფიფია ფერმერულ გაერთიანებებში, ე.წ. კიბუცებში იმყოფებოდა, სადაც უახლესი ტექნოლოგიებით აღჭურვილი მეცხოველეობისა და მეფრინველეობის ფერმები დაათვალიერა.
საქართველოს სოფლის მეურნეობის სამინისტროს დელეგაციამ ისრაელში ვიზიტი 25 ოქტომბერს დაასრულა.
25.10.13
Discussion about this post