საქართველოს რეგიონული განვითარებისა და ინფრასტრუქტურის მინისტრი, მოსახლეობის აღწერის სამთავრობო საკოორდინაციო კომისიის თავმჯდომარე დავით ნარმანია, საქართველოს სტატისტიკის ეროვნული სამსახურისა (GEOSTAT) და გაეროს მოსახლეობის ფონდის საქართველოს ოფისის (UNFPA) ხელმძღვანელები დღეს სასტუმრო „ჰოლიდეი ინ“-ში, საქართველოს მოსახლეობის 2014 წლის აღწერასთან დაკავშირებით, საერთაშორისო დონორ ორგანიზაციებს შეხვდნენ.
შეხვედრაში მონაწილეობდნენ საქართველოში აკრედიტებული საელჩოების, მსოფლიო ბანკის, საერთაშორისო სავალუტო ფონდის, გაერთიანებული ერების ორგანიზაციისა და სხვა საერთაშორისო ორგანიზაციების წარმომადგენლები.
„მოსახლეობის საყოველთაო აღწერა ერთ-ერთი ყველაზე მნიშვნელოვანი ღონისძიებაა ნებისმიერი ქვეყნის განვითარებისთვის. მითუმეტეს, მნიშვნელოვანია იგი საქართველოსთვის, რომელმაც 10 წელი დაკარგა ამ მიმართულებით. საქართველოს სჭირდება რეალური ციფრები, ზუსტი ინფორმაცია იმისთვის, რომ სწორად დაგეგმოს ქვეყნის განვითარების სტარატეგიები,“ – განაცხადა კონფერენციის გახსნისას დავით ნარმანიამ, – „ჩვენ უკვე ბევრი სამუშო ჩავატარეთ: დაზუსტდა გეოინფორმაციული სისტემა, წინასწარი გამოკითხვები ჩატარდა აჭარაში, გურიაში, კახეთში. მალე ამ ჩამონათვალს დაემატება თბილისიც. ეს ხანგრძლივი, შესაბამისად, ხარჯიანი პროცესია, ამდენად, ჩვენთვის მნიშვნელოვანია მასში დონორი ორგანიზაციების ჩართვა. მინდა მადლობა გადავუხადო გაეროს მოსახლეობის ფონდსა და მსოფლიო ბანკს, რომლებიც აქტიურად გვიჭერენ მხარს ამ საქმეში.“
გაეროს მოსახლეობის ფონდი, მისი მანდატიდან გამომდინარე, ტექნიკურდახმარებას უწევს მოსახლეობის საყოველთაო აღწერის ჩატარებას მსოფლიოსმრავალ ქვეყანაში. გაეროს მოსახლეობის ფონდის საქართველოს ოფისმა დახმარებაგაუწია 2002 წელს ჩატარებულ საყოველთაო აღწერას და აგრძელებს ფინანსურ დატექნიკურ მხარდაჭერას 2014 წლის აღწერისათვის.
„ის სამუშო, რომელიც მოსახლეობის აღწერის სამთავრობო საკოორდინაციო კომისიამ უკვე გასწია გვაძლევს იმედს, რომ 2014 წლის მოსახლეობის საყოველთაო აღწერა მაღალი ხარისხით ჩატარდება, რისთვისაც, მინდა მადლობა გადავუხადო ბატონ დავით ნარმანიას,“ – განაცხადა გაეროს მოსახლეობის ფონდის წარმომადგენელმა საქართველოში თამარ ხომასურიძემ, – „ამ აღწერას დიდი მნიშვნელობა აქვს არა მარტო საქართველოს მოსახლეობისა და ხელისუფლებისათვის, არამედ დონორი ორგანიზაციებისათვისაც, რომლებიც შეძლებენ საკუთარი პროგრამები უფრო მიზანმიმართულად, აღწერის შედეგებით გამოკვეთილი პრიორიტეტების შესაბამისად დაგეგმონ და განახორციელონ.“
საქართველო პირველი ქვეყანაა კავკასიაში, რომელიც მოსახლეობის საყოველთაო აღწერას გეოინფორმაციული სისტემების გამოყენებით განახორციელებს.
2014 წლის აპრილამდე მთელი საქართველოს მასშტაბით ჩატარდება აღწერის მოსამზადებელი სამუშაოები, კერძოდ: თითოეულ შენობაში მოსახლეობისა და შინამეურნეობების რაოდენობის წინასწარი დადგენის მიზნით, მოხდება შენობებისა და მათში მცხოვრები მოსახლეობის წინასწარი შემოვლა. აღნიშნულ სამუშაოებში დასაქმებულთა რაოდენობა მიაღწევს დაახლოებით 4 ათას ადამიანს.
„კმაყოფილები ვართ მოსახლეობის აქტიურობით, რაც უკვე ჩატარებული სამუშოების დროს გამოჩნდა,“ – განაცხადა საქართველოს სტატისტიკის ეროვნული სამსახურის უფროსის მოადგილემ, თენგიზ ცეკვავამ, – „მოსამზადებელი სამუშაოების დასრულების შემდეგ, 2014 წლის 5-19 ნოემბერს ჩატარდება საველე სამუშაოების მეორე, უმნიშვნელოვანესი ეტაპი – მოსახლეობის აღწერა. ამ მიზნისთვის შეირჩევა დაახლოებით 15 ათასამდე პერსონალი, რომლებიც სპეციალური კითხვარების მეშვეობით ინდივიდუალურად გამოკითხავენ მოსახლეობას. აღსანიშნავია ისიც, რომ აღწერაზე გაწეული დანახარჯებისა და ადამიანური რესურსების ოპტიმალურად გამოყენების მიზნით, სამთავრობო საკოორდინაციო კომისიამ მიიღო გადაწყვეტილება, მოსახლეობის აღწერასთან ერთად, სასოფლო-სამეურნეო აღწერის ჩატარების შესახებ. შესაბამისად, სოციალურ და დემოგრაფიულ მონაცემებთან ერთად, შეგროვდება ინფორმაცია შინამეურნეობების სასოფლო-სამეურნეო აქტიურობის შესახებ.“
წინასწარი მონაცემებით, საქართველოს მოსახლეობის საყოველთაო აღწერა 18 მილიონ ლარზე მეტი ჯდება და ამ თანხის ძირითადი ნაწილი აღწერისთვის დაქირავებული ადამიანების შრომის ანაზღაურებაზე იხარჯება.
2013 წლის 2 აპრილს, საქართველოს მოსახლეობის აღწერის სამთავრობო საკოორდინაციო კომისიამ დაამტკიცა საქართველოს მოსახლეობის 2014 წლის საყოველთაო აღწერის პროგრამა და მიიღო გადაწყვეტილება მოსახლეობის აღწერის 2014 წლის 5-19 ნოემბერს ჩატარების შესახებ.
06.11.13
Discussion about this post