„ზღაპრული შეგრძნებაა, როცა თვალწინ გიდევს შენი საყვარელი სახლის მაკეტი“

კონკრეტული შენობები, არქიტექტურა ჩვენთვის აუცილებლად არის დაკავშირებული ემოციებსა და წარსულთან – დროსთან, რომელმაც კვალი დატოვა. შესაბამისად, ჩვენ ვცდილობთ, ამა თუ ფორმით, ეს შეგრძნებები და მოგონებები შევინახოთ, შევინარჩუნოთ. შეიძლება ითქვას, სწორედ ამ მიზანს ემსახურება Igivea • იგივეა.

ეს არის სამყარო, რომელსაც ოცნებების ასრულება შეუძლია. „იგივეა“ ყველა დეტალს უდიდეს ყურადღებას უთმობს, რადგან სწორედ დეტალები ქმნის მოგონებებს. „თბილისი თაიმსს“ კახა ჟღენტი ესაუბრა.

საიდან გაჩნდა იდეა?

ყოველთვის ძლიერი ნებისყოფით გამოვირჩეოდი, რაც მადგებოდა პირად ცხოვრებაში თუ საქმიანობაში. ამასთან ერთად, ბავშვობიდანვე მიზიდავდა დეტალებთან ურთიერთობა, რაშიც აუცილებელია დაკვირვება და მოთმინება, ამას დაემატა განათლება არქიტექტურული განხრით და გაჩნდა მინიატურული ნაკეთობების შექმნის იდეაც.

დეტალურად რომ გვითხრათ, რას ამზადებთ?

ალბათ, იცით, რამხელა ენერგეტიკის მატარებელი შეიძლება, იყოს რაიმე შენობა, მაგრამ მის ათჯერ შემცირებულ ვერსიას რა ეფექტის მოხდენა შეუძლია, ბევრი ვერ მიხვდება. ზღაპრული შეგრძნებაა, როცა თვალწინ გიდევს შენი საყვარელი სახლის ან საოცნებო კოტეჯის მაკეტი (დიორამა) და შეგიძლია, წარმოიდგინო თავი მასში ისეთივე პატარა, როგორც თვითონაა. უსაზღვროდ სასიამოვნოა მასზე დაკვირვება და რთულია თვალის მოწყვეტა, როცა თითოეული დეტალი გიპყრობს და გინდება შემოწმება, იგივეა თუ არა ის, რაც რეალურად.
ეს ემოციები არც ისე ბევრი იყო პირველი ნამუშევრის დროს, მაგრამ, ჩემს განვითარებასთან ერთად, თანდათან გაიზარდა კმაყოფილი და გაოცებული სახეების რაოდენობაც, ასევე, მრავალფეროვანი გახდა მშენებლობის სტილიც: ასანთს ღერებით აწყობილ სახლებს დაემატა სრულყოფილი დიორამები – ბევრად დახვეწილი დეტალები და რეალისტური რელიეფი..

როგორ გახდა საზოგადოებისთვუს ცნობილი თქვენ შესახებ?

გვერდის შექმნის იდეამაც არ დააყოვნა და, ჩემი ნამუშევრების მთავარ პრინციპზე დაყრდნობით, მას დაერქვა სახელი Igivea • იგივეა, რაც მომხმარებლის სურვილს ემსახურება.. რაც უფრო დეტალურია მოწოდებული ინფორმაცია შენობის შესახებ, მით უფრო მიახლოებულია საბოლოო შედეგიც.

უცხოელები თუ არიან დაინტერესებული?

არქიტექტურული გამოწვევები უსაზღვროა და როგორც საქართველოს მრავალფეროვნება, ასევე სხვა ქვეყნის არქიტექტურული ნაგებობების გამინიატურებაც არ წარმოადგენს ჩვენთვის სირთულეს, ამის მაგალითია ტაჯ-მაჰალის მაკეტი, რომელმაც დიდი გამოხმაურება გამოიწვია ჩვენი უცხოელი მეგობრების მხრიდან.

მასალა მოამზადა : მარიამ ტიელიძემ