ხშირად ხდება – რომ ადამიანები ირჩევენ პროფესიას, რომელიც განსხვავდება იმისგან, რაც მათ ბევრად ადრე სურდათ. თუმცა, თითოეულ ჩვენგანს აქვს რეალური შესაძლებლობა, თუკი სურვილი დიდია, ერთზე მეტ მიმართულებას მოერგოს და საკუთარი არაერთი ინტერესი ცხოვრების ნაწილად აქციოს.
დღეს ჩვენ თეიმურაზ ნადარეიშვილის შესახებ გიამბობთ. მიუხედავად იმისა, რომ მას სხვა ინტერესი ჰქონდა, საკუთარი პროფესიული საქმიანობა ფიზიკას, უფრო ზუსტად კი, კვანტურ ფიზიკას დაუკავშირა. თუმცა, იმის გამო, რომ მისი ყოველდღიურობა გაცილებით მრავალფეროვანი და აქტიური ყოფილიყო, მწერლობაშიც შეიტანა საკუთარი წვლილი.
ჩვენი რესპონდენტი დღესდღეობით ასისტენტ-პროფესორია. კითხულობს ლექციებს ივ. ჯავახიშვილის სახელობის თბილისის სახელმწიფო უნივერსიტეტში და არის თეორიული ფიზიკის სპეციალისტი. როგორც ის “თბილისი თაიმსთან” საუბრისას აღნიშნავს, მისი სპეციალობით დღეს არაერთი ახალგაზრდაა დაინტერესებული და ეს ინტერესი მზარდია.
თეიმურაზ ნადარეიშვილის სამეცნიერო ინტერესის სფერო ველის კვანტური თეორია და ელემენტარული ნაწილაკების ფიზიკაა. როგორც ის აღნიშნავს, სწორედ ეს მიმართულებები იძლევა ბუნების, სამყაროს შეცნობის საშუალებას. რესპონდენტი ხაზს უსვამს, რომ ფიზიკა მისთვის სამყაროს სწორად შემეცნების ერთადერთი საშუალებაა.
როგორც დასაწყისში აღვნიშნეთ, ბატონ თეიმურაზს წლების წინ, სანამ ფიზიკით დაინტერესდებოდა, სხვა მიმართულება იზიდავდა. თუმცა, მან წლების შემდგომაც მოახერხა, ეს ინტერესი საკუთარი ყოველღიურობისთვის მოერგო, დეტალებზე თავად გვიყვება.
“მე ყოველთვის მაინტერესებდა გამოძიება. სურვილი მქონდა, გამოვსულიყავი გამომძიებელი. მქონდა ინტერესი, გამერკვია, ესა თუ ის მოვლენა რატომ ხდებოდა და რა იმალებოდა მის უკან. იურისტი არ გამოვედი, მაგრამ ახლა ვიძიებ, რა ხდება ბუნებაში. პასკალი იყო შესანიშნავი მეცნიერი, მაგრამ ძალიან კარგი ლიტერატურული ჩანაწერები აქვს შექმნილი. ადამიანს ბეზრდება ხოლმე მკაცრი ფორმულები, ლოგიკაც კი ბეზრდება და სურს, იყოს მეტად თავისუფალი.
ჩემს შემთხვევაში, ამ დროს იბადება ლიტერატურული ჩანახატები, რომლებსაც უკვე რამდენიმე წელია, გამოვცემ. მას ჰქვია “სულის ფოტოგრაფიები”. პატარა უბის წიგნაკი მუდამ თან დამაქვს. ვაკეთებ ჩანაწერებს. წიგნის გამოცემაზეც ვფიქრობ. უკვე 15 წელია, სხვადასხვა ჟურნალ-გაზეთში იბეჭება ჩემი ჩანახატები.
ამჟამად, “ჰამლეტზე” ვწერ დიდ სტატიას, ასევე, ვთარგმნი – თან თარგმანებია ჩემი და თან კომენტარები. ვთარგმნი ინგლისურიდან, რუსულიდან… როდესაც ფიზიკა მომბეზრდება, გადავდივარ ამ მიმართულებით და პირიქით”, – ამბობს თეიმურაზ ნადარეიშვილი “თბილისი თაიმსთან” საუბრისას.
მასალა მოამზადა : მარიამ ტიელიძემ
Discussion about this post