კომპანია „მანნა“ 2017 წელს დაარსდა. საკუთარი პროდუქციიდან გამომდინარე, მისით ბევრი ადამიანი დაინტერესდა. ის მომხმარებელს ეკოლოგიურად სუფთა პროდუქციას სთავაზობს – ბრენდი ბუნებრივი თვისებების მქონე ჩაის აწარმოებს.
„თბილისი თაიმსს“ მარკეტინგისა და საზოგადოებასთან ურთიერთობის მენეჯერი, ეკუნა ჯაგოდნიშვილი ესაუბრა.
„ჩვენი კომპანია აწარმოებს ქართულ, პრემიუმ ხარისხის ჩაის. ამ ეტაპზე, გვაქვს 13 სახეობა – როგორც დასაყენებელ შეფუთვაში, ისე – ერთჯერადებში. ესენია შავი ჩაი, მწვანე, კლასიკური, ასევე, გვაქვს შავი ჩაი ბექონდარით, შავი და მწვანე ჩაი ასკილით, ლიმონით, პიტნით… ბოლო პერიოდში დავამატეთ ახალი სახეობა – შავი ჩაი კენკრით, რომელიც მოიცავს ქართულ მაყვალსა და ჟოლოს. ჩვენი ყველა ეს ნედლეული არის 100 %-ით ქართული.
რაც ყველაზე მთავარია, ჩვენი ბრენდი გამოირჩევა იმით, რომ არ ვიყენებთ არომატიზატორებსა და საღებავებს. ანუ “მანნა”-ს ჩაი ბუნებრივი თვისებებისაა. ზოგჯერ მომხმარებლებს აქვთ პრეტენზია და ამბობენ, რომ როდესაც ერთჯერად ჩაის მდუღარე წყალს ასხამენ, ის ფერს სწრაფად არ უშვებს. ეს არის ხარისხის ნიშანი და მეტყველებს იმაზე, რომ ჩაი არ შეიცავს საღებავებს. ამ შემთხვევაში, ფერის მისაღებად 2-დან 5 წუთამდეა საჭირო“, – აღნიშნავს ეკუნა და ამბობს, რომ კომპანია უკვე ქართულ თხილსაც სთავაზობს მომხმარებელს.
„გვაქვს ახალი პროდუქტი ქართული თხილის სახით. ის არის მოხალული და ბლანშირებული, რაც ნიშნავს იმას, რომ ხდება ტექნოლოგიურად დამუშავება, კანის გაცლა და შემდგომ მოხალვა. ისიც უკვე იყიდება ქსელურ მარკეტებში.
გარდა ამისა, დღესასწაულებზე გვაქვს ხოლმე სასაჩუქრე ნაკრებები. მომხმარებელს აქვს შესაძლებლობა, ნაკრები საკუთარი გემოვნებით შეარჩიოს. ასეთი პროდუქტები ჩვენთან დიდი პოპულარობით სარგებლობს“, – ამბობს ეკუნა ჯაგოდნიშვილი „თბილისი თაიმსთან“ საუბრისას და აღნიშნავს, რომ კომპანია არაერთი სერტიფიკატის მფლობელია.
„ჩვენი კომპანია ქართულ ბაზარზე 2017 წლიდან პოზიციონირებს. ჩეხეთში გვაქვს საწყობი და იქიდან მარაგდება აღმოსავლეთ ევროპის ქვეყნები. ასევე, მნიშვნელოვანია ის, რომ დანერგილი გვქონდა ISO 22 000, საერთაშორისო დონის სტანდარტი. ახლა გადავედით შემდეგ ეტაპზე – FSSC 22 000-ის ავიღეთ. ეს საკმაოდ მაღალი სტანდარტია და მას საქართველოში ბევრი კომპანია არ ფლობს“.
მასალა მოამზადა : მარიამ ტიელიძემ
Discussion about this post