“მეგრულიც და სვანურიც ჩვენი საგანძურია” – რას ფიქრობენ ადგილობრივები

რამდენიმე დღის წინ, საქართველოს პრეზიდენტი, სალომე ზურაბიშვილი გამოვიდა ინიციატივით, რომ მეგრული და სვანური სკოლაში არჩევით საგნებად ისწავლებოდეს. აღნიშნულს სოციალურ ქსელებში დიდი გამოხმაურება მოჰყვა. საზოგადოების უმრავლესობა მიიჩნევს, რომ ინიციატივა დროული და საჭიროა. დანარჩენები საუბრობენ, რამდენად არის შესაძლებელი ამ სიახლის დამკვიდრება.

“ვჩაგრავთ ჩვენი ენის ფუძე ენებს – მეგრულსა და სვანურს. რატომღაც გვეშინია ქართულის უმდიდრეს ლიტერატურულ ენად ჩამოყალიბებაში მათი როლის აღიარება”, – აღნიშნული ზურაბიშვილმა დედაენის დღისადმი მიძღვნილ მიმართვის ტექსტში გააჟღერა.

“თბილისი თაიმსთან” საუბრისას, სამეგრელოს მკვიდრი, მარიამ დარსალია საუბრობს, რას ფიქრობს აღნიშნული ინიციატივის შესახებ:
“პირადად ჩემთვის, ეს საკითხი ძალიან მგრძნობიარეა. მომწონს იდეა და დიდი იმედი მაქვს, ის პრაქტიკაში განხორციელდება. აშკარაა, რომ, მათ შორის, მეგრულის ენის “სიცოცხლეს” საფრთხე ემუქრება, ასე ვთქვათ. ჩვენ, მთელი საქართველო, და არამხოლოდ მეგრელები, ვართ ვალდებულები სწორედაც რომ ჩვენი ქვეყნის, ისტორიის წინაშე, რომ შევინარჩუნოთ მეგრული ენა. ის ერთერთია, რაც ჩვენს იდენტობას განსაზღვრავს. არცთუ ისე მცირე ძალისხმევაა საჭირო მის შესანარჩუნებლად. აუცილებელია ფიქრი, მუშაობა იმაზე, თუ როგორ უნდა მოვუაროთ მას. ამის აუცილებლობა უნდა დაინახონ ქართველებმა”.

ჩვენთან საუბრისას, წარმოშობით სვანი, მარიამ გულბანი ხაზს უსვამს, რატომ არის სვანური ენა საქართველოსთვის ძვირფასი.
“ჩემი აზრით, ძალიან საამაყოა, რომ გვაქვს სვანური ენა. ნამდვილად, სვანეთი ტურისტებისთვის გამორჩეულად საინტერესო ადგილია და სვანური ენა არის ის ერთერთი მთავარი, რის შესახებაც ისინი საუბრობენ. არ ვიცი, რა ნაბიჯებით არის შესაძლებელი პრეზიდენტის ინიციატივის შესრულება, თუმცა, მე ის ძალიან მომწონს. ენას ძალიან დიდი ისტორია აქვს, რითაც თავს ვიწონებთ. ის, უბრალოდ, საინტერესოა. ვისურვებდი, ბევრ ახალგაზრდას ჰქონდეს მისი შენარჩუნების, გავრცელების, შესწავლის სურვილი. არანაირი უფლება არ გვაქვს, ის გავაქროთ ჩვენი ისტორიიდან და აღარ იარსებობს აწმყოში”.
“მეგრულიც და სვანურიც ჩვენი საგანძურია, რომელსაც უნდა ვიცავდეთ და ვანიჭებდეთ სწორ ადგილს. ყველა მსურველს უნდა ჰქონდეს სკოლაში ამ ენების არჩევით შესწავლის საშუალება და არ უნდა ვემორჩილებოდეთ ცრუ შიშებს!”, – განაცხადა სალომე ზურაბიშვილმა.