“თუ მომხმარებლის საკრედიტო ისტორია გაფუჭებულია, ამას ყურადღებას აქცევს ყველა საფინანსო ინსტიტური, განსაკუთრებით – კომერციული ბანკები და მათ, ვისაც ვადაგადაცილება ან დავალიანება აქვს, როგორც წესი, სესხს არ აძლევენ. ხშირად იქმნება პრობლემა, როდესაც ადამიანს დაფარული აქვს გარკვეული ვალდებულება, მაგრამ საკრედიტო ისტორია უკვე გაფუჭებულია და შესაძლოა, მის გამოსწორებას გარკვეული პერიოდი დასჭირდეს. ამიტომ, ძალიან მნიშვნელოვანია, გავითვალისწინოთ, რომ 21-ე საუკუნეში კარგი საკრედიტო ისტორია ძალიან მნიშვნელოვანია, რათა ჩვენ მიმართ ნდობა არ შემცირდეს კომერციული ბანკის მხრიდან და როდესაც დაგვჭირდება, სესხის აღება შევძლოთ”, – ამის შესახებ “საზოგადოება და ბანკების” დამფუძნებელმა, გიორგი კეპულაძემ “თბილისი თაიმსთან” საუბრისას განაცხადა.
როგორც კეპულაძემ აღნიშნა, საკრედიტო ისტორიის გასაუმჯობესებლად მთავარი გზაა, დროულად დაიფაროს დავალიანება.
“თუ მაინც შეიქმნა პრობლემა და ნეგატიური ჩანაწერი გაჩნდა მომხმარებელთან დაკავშირებით, არსებობს ერთი მთავარი გზა – რაც შეიძლება სწრაფად დავფაროთ დავალიანება. ამას აქვს გარკვეული ხანდაზმულობის ვადა – ეს გახლავთ 5 წელი. 5 წლის მანძილზე ჩანს, რომ ჩვენ გვქონდა დავალიანება, მაგრამ ასევე ჩანს, რომ ჩვენ ეს დავალიანება დავფარეთ. დღეს კომერციული ბანკების მხრიდან, მათ შორის, მიკროსაფინანსო ორგანიზაციის მხრიდან მიდგომა არის ისეთი, რომ როდესაც ჩვენ დავფარავთ დავალიანებას, ანუ გამოვასწორებთ საკრედიტო ისტორიას, გარკვეული პერიოდის შემდეგ, რაღაც რაოდენობის სესხის მიღება შეგვიძლია.
ამით მომხმარებელს ეძლევა შესაძლებლობა, აჩვენოს, რომ ის სესხს სტაბილურად იხდის და ადრე არსებული შემთხვევა იყო საყოფაცხოვრებო პირობების შედეგად გამოწვეული. შეიძლება, ნებისმიერმა ადამიანმა დაკარგოს სამსახური. ჩვენს ანგარიშზე უნდა იყოს სტაბილური ჩარიცხვები და თუ, მაგალითად, ვისარგებლებთ განვადებით, დროულად უნდა დავფაროთ ის. ამით გავიუმჯობესებთ საკრედიტო ისტორიას და ჩვენ მიმართ იარსებებს ნდობა”, – განაცხადა გიორგი კეპულაძემ.
Discussion about this post