ბათუმში, „საქართველოს ბანკის“ ფილიალში, შეიარაღებულმა მძარცველმა მძევლების აყვანა სცადა. შემთხვევა დღეს, 10 ივნისს, დაახლოებით 12 საათზე მოხდა, „საქართველოს ბანკის“ ბათუმის ერთ-ერთ ფილიალში. ინფორმაციას ამის შესახებ „ბათუმელები“ ავრცელებს.
ბანკის ერთ-ერთი თანამშრომლის მონათხრობის თანახმად, თავდამსხმელი სალაროს გახსნას ითხოვდა. მან სცადა მძევლის აყვანაც იარაღის მუქარით, მაგრამ ვერ მოახერხა, რადგან ბანკის სხვა თანამშრომლებმა წინააღმდეგობა გაუწიეს.
„წინააღმდეგობის შემდეგ მძარცველმა პისტოლეტის მსგავსი იარაღიდან ერთხელ გაისროლა ჰაერში. სროლის ხმაზე ბანკის თანამშრომლები გარეთ გამოიქცნენ. შენობაში დარჩა მხოლოდ მძარცველი და როცა მიხვდა, რომ სალაროს ვერ გახსნიდა, თავადაც გაიქცა“, – გვიყვება ბანკის თანამშრომელი.
მისი თქმით, მძარცველმა თანხის წაღება ვერ მოახერხა.
როგორც თანამშრომელი ამბობს, 20-25 წლამდე მამაკაცს ყვითელი ჰუდი ეცვა და სათავლე ეკეთა.
ბანკში ამ ეტაპზე კრიმინალისტებიც მუშაობენ.
