ნებისმიერი საქმიანობა, რომელსაც საფუძვლად ქართული მოტივები უდევს, დღემდე წარმატებულია ჩვენს ქვეყანაში. ეროვნული, ტრადიციების მატარებელი დეტალები განსაკუთრებულ ყურადღებას იქცევს როგორც ქართველებში, ისე – უცხოელებში, რადგან ისინი მსოფლიოში ერთადერთია და არ მეორდება. ექვსი წელია, რაც ნათია გოგოჭურმა საკუთარი ნამუშევრების შექმნა დაიწყო. ის სამოსს ამზადებს, რომლის მიზანიც ქართულის უკვდავყოფაა.
ნათია „თბილისი თაიმსს“ უამბობს, როგორ იქმნება მისი ნამუშევრები.
„ძირითადი ხაზი ქართული მოტივებია ჩემთვის. ნამუშევრებში, რომლებსაც ვქმნი, ვიყენებ ხევსურული ტალავრის მოტივებს და ნაქარგობას. კოლექცია, რომელიც ახლა არის წარმოდგენილი, ხევსურული ტალავრისა და იაპონური კიმანოს მოტივებზეა აწყობილი.
ნამუშევრები იკერება ჩემი დიზაინით, მაგრამ თუ მომხმარებელს აქვს სურვილი, საკუთარ შერჩეულ სამოსს დაუმატოს ქართული ელემენტები, ვიღებთ ასეთ შეკვეთებს“, – ამბობს ნათია.
როგორც ის აღნიშნავს, მრავალფეროვან სამოსს ქმნის, გარდა ამისა, მომხმარებლებს აქსესუარებსაც სთავაზობს.
„ყველა ტიპის სამოსის შეძენა არის შესაძლებელი, რადგან მრავალფეროვნება გვაქვს ამ მხრივ მხოლოდ ერთ კონკრეტულ სტილზე არ ვმუშაობ. ასევე, სამოსთან ერთად, არის შესაძლებელი აქსეაუარების შეძენაც.
ჩემი დიდი სურვილია, ქართული სამოსი დავიწყებას არ მიეცეს და მისი ხილვა მხოლოდ სამუზეუმო დარბაზის მეშვეობით არ შეგვეძლოს. მსურს, ამ მხრივ ძველი ორნამენტი და სტილი ისე გადმოვიტანო თანამედროვე სამოსსში, რომ იყოს კომფორტული და გამოყენებადი როგორც ყოველდღიურ ცხოვრებაში, ისე – განსაკუთრებულ დღეებში. ამიტომ, ამ მხრივ დიდი გეგმები მაქვს“, – ამბობს ნათია გოგოჭური.
Discussion about this post