„კრაველი“ – ეს იმ ბრენდის სახელწოდებაა, რომელიც მომხმარებელს ერთდროულად ხარისხიან და გამორჩეულ პროდუქციას სთავაზობს. ეს გახლავთ ექსკლუზიური დიზაინით შექმნილი, ტყავის ხელნაკეთი აქსესუარები. ვინტაჟური სტილი საზოგადოებისთვის ძალიან სასურველია. ბრენდი სწორედ ამ მიმართულებით ქმნის. დეტალებზე „თბილისი თაიმსს“ თამარ ბლიაძე ესაუბრა.
დეტალურად რომ გვითხრათ, რას ამზადებთ?
„კრაველი“ ქმნის ექსკლუზიური დიზაინის ხელნაკეთ ტყავის აქსესუარებს. მათ შორის: ჩანთებს, საფულეებს, ქამრებს, კორსეტებს და სხვადასხვა ნაწარმს. ხელით იქმნება თითოეული აქსესუარი თავიდან ბოლომდე და ასევე ხელით იხატება. მაღალი ხარისხის ნატურალური ტყავით იქმნება აქსესუარები, რაც გარანტიას იძლევა, რომ დიდხნიანი მეგზურობა გაუწიოს მომხმარებელს თითოეულმა ნივთმა.
რა არის ის ძირითადი ხაზი, რასაც თქვენი ნამუშევრები მიყვება?
ვინტაჟურ სტილში შერეული მოდერნისტული ელემენტები არის ,,კრაველის,, დამახასიათებელი სტილი, რაც ნამუშევრებს ხდის განსაკუთრებულს. ჩვენი ძირითადი მომხმარებლები არიან ქალბატონები, თუმცა, ასევე, გვაქვს მამაკაცის ხაზიც.
რის გამო გაგიჩნდათ იდეა, მსგავსი ნივთები დაგემზადებინათ?
ბავშვობიდანვე მიყვარდა ხატვა და ხატვის სიყვარულმა მიმიყვანა მოდის დიზაინერობამდე, სამხატვრო აკადემიაში შევისწავლე მოდის დიზაინი ტყავის მიმართულებით, რის შემდეგაც გამიჩნდა იდეა, მეწარმოებინა ტყავის აქსესუარები, რაშიც დიზაინთან ერთად ჩავრთავდი მხატვრობას, შემოქმედებით სულს.
ხშირად ამატებთ განსხვავებულ პროდუქციას?
,,კრაველი,, სხვა მახასიათებლებთან ერთად, ასევე, გამოირჩევა ექსპერიმენტული ხასიათით, ჩვენ ვმუშაობთ სხვადასხვა ახალ აქსესუარსა და დიზაინზე, რაც საბოლოოდ ქმნის მრავალფეროვნებას და მომხმარებელს საშუალება ეძლევა ფართო ასორტიმენტის არჩევის.
მხოლოდ ქართველები არიან თქვენი პროდუქციის მომხმარებლები?
ჩვენი ძირითადი მომხმარებლები არიან ქართველები, თუმცა, დაინტერესება ყოფილა უცხოელებისგანაც, გამოფენა-გაყიდვებზე არაერთმა უცხოელმა შეიძინა ჩვენი პროდუქცია. სამომავლოდ კი ვგეგმავთ უცხოურ ბაზარზე გასვლას.