„რედ“ – ეს იმ ბრენდის სახელწოდებაა, რომელიც მომხმარებელს ხელნაკეთ დაწნულ ქუდებსა და სხვა გამორჩეულ, ვინტაჟურ აქსესუარებს სთავაზობს. თითოეული მათგანი ერთადერთია, არ მეორდება და, რაც ყველაზე საინტერესოა, იქმნება ხელით.
26 წლის თამარ მაჭავარიანი პროფესიით ხელოვნებათმცოდნე და დიზაინერია. მისი საყვარელი საქმიანობა ფოტოგრაფიაა. გარდა ამისა, ამ ეტაპზე, ის გახლავთ NFT სამყაროთი დაინტერესებული და დიდ დროს უთმობს პროექტის განვითარებას. საკუთარი საქმიანობის შესახებ, „თბილისი თაიმსს“ ის თავად ესაუბრა.
„მაქვს აქსესუარების პატარა ბრენდი – „რედი“. მესამე წელია, ის საქართველოს ბაზარზეა, თავისი ჩავარდნებითა თუ წინსვლით. ვამზადებთ ხელნაკეთ დაწნულ ქუდებსა და სხვადასხვა აქსესუარს: თმისსამაგრებსა და ვინტაჟურ საყელოებს, გარდა ამისა, პანდემიის პერიოდში ვქმნიდით პირბადეებს. პირველ ყოვლისა, თითოეული მათგანი მზადდება ინდივიდუალურად, ხელით.. ყოველთვის ვცდილობ, რომ წარმოება არ იყოს მასობრივი და გარკვეული უნიკალურობა შეინარჩუნოს ნივთებმა“, – ამბობს თამარი.
ის აღნიშნავს, რისგან მზადდება საზაფხულო მოწნული ქუდები და ვინ არის, უმთავრესად, მათი პროდუქციის მომხმარებელი.
„საზაფხულო მოწნული ქუდები მზადდება დამუშავებული ქაღალდისაგან, რომელიც უძლებსა წყალსა და სიცხეს, ქუდები გაფორმებულია სხვადასხვა დიზაინის ატლასის ლენტებით. აქსესუარების დიდი ნაწილი გათვილია ქალბატონებზე, შესაბამისად, მომხმარებლების 90 პროცენტი არიან განსხვავებული და დახვეწილი გემოვნების მქონე ქალები, გარდა ამისა, დიდია ტურისტების დაინტერესება“, – ამბობს თამარ მაჭავარიანი.
Discussion about this post