მათთვის, ვისთვისაც ზღვა და მასთან დაკავშირებული ემოციები განსაკუთრებით მნიშვნელოვანია, “ბააკა” ძალიან განსხვავებულ და ორიგინალურ სამკაულებს სთავაზობს. უკვე ექვსი წელია, რაც ბრენდი არსებობს. სოფიო ბააკაშვილმა ბიზნესი, როგორც ამბობენ ხოლმე, “ნულიდან დაიწყო”. თუმცა, საქმისადმი სიყვარულმა და ინტერესმა მას მისცა შესაძლებლობა, სირთულეები გადაელახა და საზოგადოების დიდი ნაწილისთვის გაეცნო საკუთარი ნამუშევრები. “თბილისი თაიმსს” სოფიო ბააკაშვილი ესაუბრა.
“ჩვენი სამკაულები გახლავთ ხელნაკეთი ვერცხლი. ყველაფერს ვამზადებ ხელით, ისინი არ არის ჩამოსხმული. ზღვაში ნაპოვნი შუშებითა და კერამიკით მზადდება. თითოეული სამკაული არის ინდივიდუალური, რადგან ყველა ნაპოვნი შუშა ერთმანეთისგან განსხვავებულია.
კერამიკა რაც შეეხება – ისინი იდენტური არასდროს მიპოვნია, სამკაულები გამოდის უნიკალურები. ყველანაირ მასალას შავ ზღვაში ვპოულობ, შესაბამისად, პროდუქცია არის აბსოლუტურად ქართული”, – ამბობს სოფიო და გვიყვება, თუ როგორ დაიწყო მისი საქმიანობის ისტორია.
“ბიზნესი დავიწყე “ნისიად”. არ მქონდა ბიუჯეტი, ყვველაფერი შევქმენი ნელ-ნელა და დამოუკიდებლად. ჩემი საქმიანობა წარმატებული აღმოჩნდა. ცნობადობა საკმაოდ კარგი გვაქვს.
სამკაულების დამზადება მე დაწყებული მქონდა, როცა სანაპიროზე თეთრი შუშა აბრჭყვიალდა. ამ დროს ისედაც უკვე ვეძებდი ახალ იდეას – რა გამეკეთებინა. მაშინ გადავწყვიტე, ჩემთვის დამემზადებინა სამკაული ამ შუშის გამოყენებით. გამოვიდა ძალიან ლამაზი. დავიწყე შეგროვება და მას მერე იდეები არის ულევად. მუდმივად ვცდილობ, არ შევქმნა ისეთი სამკაული, როგორიც უკვე არის ბაზარზე. ჩემი ნამუშევრები, გარდა ამისა, ეკომეგობრულია”, – ამბობს სოფიო ბააკაშვილი.