ინდონეზიაში საქართველოს საელჩომ, იუნესკოს მიერ მე-8 სესიაზე ქართული ქვევრის ღვინის არამატერიალური მემკვიდრეობის ძეგლის სტატუსის მინიჭებასთან დაკავშირებით საზეიმო მიღება და ქართული ღვინის დეგუსტაცია გამართა.
როგორც სამინისტროდან „თბილისი თაიმსს“ აცნობეს, ღონისძიებას ჯაკარტაში აკრედიტებული დიპლომატიური მისიების ხელმძღვანელები, ღვინის იმპორტიორი და დისტრიბუტორი კომპანიების წარმომადგენლები, აგრეთვე ღვინის ექსპერტები და მასმედიის წარმომადგენლები ეწრებოდნენ.
ღონისძიების ფარგლებში სტუმრებს წარუდგინეს დოკუმენტური ფილმი ქვევრის ღვინის დამზადებისა და ზოგადად ღვინის წარმოების ისტორიის შესახებ. საქართველოს საგანგებო და სრულუფლებიანმა ელჩმა ინდონეზიის რესპუბლიკაში ზურაბ ალექსიძემ საზოგადოებას სიტყვით მიმართა. მან აღნიშნა ღვინის, ვაზის, ქართული ტრადიციისა და კულტურის განუყოფელობა.
საქართველოს საელჩოში მისულ სტუმრებს საშუალება ჰქონდათ დაეთვალიერებინათ საელჩოში გამოფენილი ნაქსოვი ბატიკის ნიმუშები (La Maison Bleue), ასევე დაეგემოვნებინათ ქართული ტრადიციული კერძები, ტკბილეული, ალკოჰოლური (ღვინო, ჭაჭა) და უალკოჰოლო გამაგრილებელი სასმელები.
მოწვეულ სტუმართა შორის იყვნენ სინგაპურში მოღვაწე ცნობილი მედია ბიზნესის წარმომადგენელი და კინოპროდიუსერი მაიკ ვილუანი (Mike Willuan), ასევე ერთ-ერთი ინდონეზიური ტელეარხის პოპულარული კულინარიული გადაცემის წამყვანი ქ-ნი ფარაჰ ქუინი (Farah Quinn), რომლებმაც განსაკუთრებით მაღალი შეფასება მისცეს ქართულ კერძებს და ღვინოს.
საელჩოში გამართულ ღონისძიებას დაესწრნენ ჯაკარტაში გამომავალი ელიტალური ქრონიკის ამსახველი ჟურნალების „INDONESIA TATLER”, “PEAK”, წარმომადგენლები, რომლებიც მომავალ გამოცემაში ფართოდ გააშუქებენ ქართული ღვინისა და კერძების დეგუსტაციის თემას.
25.12.13
Discussion about this post