სააპელაციო სასამართლო გიგი უგულავას საჩივარზე მიღებულ გადაწყვეტილებაზე განცხადებას ავრცელებს

სააპელაციო სასამართლო გიგი უგულავას საჩივართან დაკავშირებით მიღებულ გადაწყვეტილებაზე განცხადებას ავრცელებს.

სასამართლოს ცნობით, მოსამართლე გიორგი მიროტაძის 2013 წლის 26 დეკემბრის განჩინებით დაუშვებლად იქნა ცნობილი პროკურორ მალხაზ კაპანაძის და ბრალდებულ გიორგი უგულავას ინტერესების დამცველი ადვოკატების – გიზო უგლავას, გიორგი გელხაურის და ბექა ბასილაიას საჩივრები თბილისის საქალაქო სასამართლოს მოსამართლე დალი მეტრეველის 21 დეკემბრის განჩინებაზე ბრალდებულ გიორგი უგულავას მიმართ, აღკვეთის ღონისძიების სახით, გირაოს 50000 ლარის ოდენობით გამოყენების შესახებ.

მოსამართლე გიორგი მიროტაძის 2013 განჩინებით, ბრალდებულ გიორგი უგულავას თანამდებობიდან გადაყენების შესახებ, თბილისის საქალაქო სასამართლოს მოსამართლე დალი მეტრეველის 2013 წლის 22 დეკემბრის განჩინებაზე, ბრალდებულ გიორგი უგულავას ინტერესების დამცველი ადვოკატების – გიზო უგლავას, გიორგი გელხაურის და ბექა ბასილაიას საჩივარი არ დაკმაყოფილდა.

შესაბამისად, სააპელაციო სასამართლოს გადაწყვეტილებით, გიგი უგულავას გათავისუფლება ძალაში დარჩა.

უგულავას ადვოკატები სააპელაციო საჩივრით მოითხოვდნენ უგულავასთვის შეფარდებული აღკვეთის ღონისძიების გამოყენებაზე უარის თქმას ან ალტერნატივის სახით პირადი თავდებობის გამოყენებას, ასევე თანამდებობიდან გათავისუფლების გადაწყვეტილების გაუქმებას.
პროკურატურა კი, სააპელაციო საჩივრით უგულავასთვის შეფარდებული გირაოს ნაცვლად, მის პატიმრობას ითხოვდა.

26.12.13