მთავარი პროკურორის თემა აღმასრულებელ ხელისუფლებას ეხება, – ამის შესახებ საქართველოს პრეზიდენტმა გიორგი მარგველაშვილმა ჟურნალისტებთან საუბრისას განაცხადა.
მედიის წარმომადგენლები საქართველოს პროკურორის, ოთარ ფარცხალაძის დიპლომითა და მისი შესაძლო ნასამართლობის შესახებ ინფორმაციით დაინტერესდნენ, რაზეც გიორგი მარგველაშვილმა უპასუხა, რომ განათლებასთან დაკავშირებით კითხვა მასთან არაადეკვატურია, რადგან არც არქივში მუშაობს და არც ის ადამიანია, რომელიც დიპლომებს ამოწმებს.
“შეკითხვა დიპლომის აუთენტურობის თაობაზე პრეზიდენტთან არ არის. ასეთ კითხვებს უსვამენ ან შესაბამისი უწყებების წარმომადგენლებს, ან არქივის წარმომადგენლებს”, – განაცხადა გიორგი მარგველაშვილმა.
რაც შეეხება მთავარი პროკურორის თანამდებობაზე დანიშვნის ან მისი თანამდებობიდან მოხსნის საკითხს, გიორგი მარგველაშვილმა უპასუხა, რომ საქართველოს პრეზიდენტი პარლამენტში წარადგენს არა მთავარ პროკურორსა და მინისტრების კანდიდატურებს, არამედ პრემიერ-მინისტრის კანდიდატურას.
“შესაბამისად, პროკურორის თემა ეხება აღმასრულებელ ხელისუფლებას, ეხებათ იმ პირებს, ვინც ამ თემას კურირებენ. მივცეთ მათ შესაძლებლობა, თავისი პოზიცია ჩამოაყალიბონ”, – განაცხადა გიორგი მარგველაშვილმა.
26.12.13
Discussion about this post