იანვარ-დეკემბერში საქართველოში ვიზიტორთა რიცხვი გაიზარდა

2013 წლის იანვრიდან-დეკემბრის ინტერვალში საქართველოში 5 365 356 ვიზიტი განხორციელდა, რაც 21,2%-ით აღემატება 2012 წლის ანალოგიური საანგარიშო პერიოდის მაჩვენებელს.

საქართველოს საზღვარზე გადაადგილებულ ვიზიტორთა სტატისტიკურ მონაცემებს შინაგან საქმეთა სამინისტროს საინფორმაციო-ანალიტიკური დეპარტამენტი აქვეყნებს.

რაც შეეხება უშუალოდ დეკემბერს, ოფიციალური მონაცემებით, საქართველოს 391 724 ვიზიტორი სტუმრობდა, რაც 2012 წლის იგივე პერიოდის მაჩვენებელზე 5 %-ით მეტია. 

“ამასთან, შემოღებული პირობითი დაყოფის მიხედვით, ხვედრითი წილის ურთიერთმიმართება შემდეგია: ა) ტურისტი – 2 080 808 ვიზიტი (საერთო რაოდენობის 39 %, მატება წინა წლის ანალოგიურ მაჩვენებელთან 16,3 %); ბ) ტრანზიტი – 1 167 570 ვიზიტი (საერთო რაოდენობის 22 %, მატება წინა წლის ანალოგიურ მაჩვენებელთან 54,6 %); გ) სხვა – 2 116 978 ვიზიტი (საერთო რაოდენობის 39 %, მატება წინა წლის ანალოგიურ მაჩვენებელთან 12,4 %)”, – აცხადებენ შსს-ში.

აღსანიშნავია, რომ 2013 წლის დეკემბერშიც ყველაზე მეტი ვიზიტი თურქეთიდან (-25,8%), აზერბაიჯანიდან (+16,3%), სომხეთიდან (+26,8%), რუსეთიდან (+40,6%), უკრაინიდან (+69,7%) და ირანიდან (-33,8%) განხორციელდა. 

“ასევე, პოზიტიური ტენდენცია ნარჩუნდება ევროკავშირის ქვეყნების მიმართულებიდან, საიდანაც საქართველოში ჩამოსვლების რაოდენობის ზრდის კუთხით, იანვარ-დეკემბერშიც კვლავ ტრადიციულად გამოირჩნენ პოლონეთი, ჩეხეთი, ავსტრია, საფრანგეთი, გერმანია და იტალია (შესაბამისად – 80%, 32%, 22%, 19%, 17% და 15%), შუა აზიის ქვეყნებიდან – ყაზახეთი (40%), ახლო აღმოსავლეთიდან – ისრაელი (29%), ხოლო აღმოსავლეთ ევროპის ქვეყნებიდან კი – ბელორუსის მოქალაქეები 62%–იანი მატებით”, – განმარტავენ უწყებაში.

შსს-ის ცნობით, სახელმწიფო საზღვრის კვეთის მხრივ აღსანიშნავია საქართველოს მოქალაქეთა აქტივობის ზრდაც, რაც 2013 წელს 17,1 (შემოსვლა) და 17,8 (გასვლა) პროცენტიან მატებაში გამოისახა.

06.01.14