მსოფლიოს ჩემპიონატის შესარჩევი ეტაპის მატჩში, თბილისის სპორტის სასახლეში საქართველოს ხელბურთელთა ეროვნულმა ნაკრებმა თურქეთის ეროვნულ ნაკრებს 33:26 სძლია.
ამ ნაკრებებს შორის პირველი შეხვედრა ანკარაში 2 იანვარს შედგა და მაშინ გამარჯვება მასპინძლებს დარჩათ. ამ მატჩის მოგება საქართველოს განსაკუთრებულად სჭირდებოდა, რადგან ამ გამარჯვებით ჩვენმა გუნდმა ჯგუფში პირველი ადგილის დაკავების შანსი შეინარჩუნა.
თურქეთი საკმაოდ უხერხული მეტოქე აღმოჩნდა და მასპინძელ ხელბურთელებს მოდუნების საშუალებას არ აძლევდა. პირველ ტაიმში თანაბარი ბრძოლა იყო. ანგარიში საქართველოს ნაკრებმა გახსნა და მოწინააღმდეგეს საშუალება არ მისცა წინ გასულიყო. პირველი ნახევარი ქართველთა გამარჯვებით 19:15 დასრულდა.
შეხვედრის მეორე ტაიმი ჩვენმა ხელბურთელებმა გაცილებით უფრო აქტიურად დაიწყეს, რაც შესაბანისად ანგარიშში აისახა. თურქებმა არათუ გათანაბრება, სხვაობის მინიმუმადე დაყვანაც კი ვერ მოახერხეს.
საბოლოოდ შეხვედრა ქართველ ხელბურთელთა გამარჯვებით 33:26 დასრულდა.
ჩვენს ჯგუფშიგუშინ ერთი მატჩიც ჩატარდა. ლიტვამ ფინეთს 24:23 სძლია.
მომდევნო მატჩები 8 იანვარს გაიმართება. სპორტის სასახლეში საქართველო ლიტვას უმასპინძლებს, ხოლო თურქეთი ფინეთს მიიღებს.
ცნობითვის, საქართველოს ნაკრები პლეიოფში იმ შემთხვევაში ითამაშებს თუ ლიტვა თურქეთთან შეხვედრაში ქულას მაინც დაკარგავს, ჩვენ კი დარჩენილ ორივე შეხვედრას მოვიგებთ.
1 ჯგუფი – ლიტვა 7 ქულა/ საქართველო 4 ქულა/ ფინეთი 3 ქულა/ თურქეთი 2 ქულა.
08.01.14
Discussion about this post