საქალაქო სასამართლოს გადაწყვეტილებით საპატრიარქოსთან მომხდარი შეხლა-შემოხლის დროს დაკავებული ოთხი პირიდან სამს 100-100-ლარიანი ჯარიმის გადახდა დაეკისრათ, ხოლო ერთმა სასამართლოსგან შენიშვნა მიიღო.
ოთხი დაკავებული პირის ადმინისტრაციული საქმე მოსამართლე ნანა ჭიჭილეიშვილმა განიხილა, რომლის გადაწყვეტილებით 100-100 ლარით დაჯარიმდნენ თორნიკე ქავთარაძე, სანდრო ზაუტაშვილი და ევგენი ქავთარაძე, გაფრთხილება კი ვეფხვია ღვალაძემ მიიღო.
დღევანდელ სასამართლო პროცესზე დაიკითხნენ დაზარალებულები, რომლებმაც შეხლა-შემოხლის დროს მათზე განხორციელებულ სიტყვიერ და ფიზიკურ შეურაცხყოფაზე ისაუბრეს. თავად ბრალდებულები კი, რომელთაც ბრალად ადმინისტრაციულ სამართალდარღვევათა კოდექსით 166-ე მუხლით გათვალისწინებული დანაშაული ედებოდათ, რაც წვრილმან ხულოგნობას გულისხმობს, ბრალს არ აღიარებენ. ერთ-ერთი ბრალდებულის ვეფხვია ღვალაძის განცხადებით, იგი დაპირისპირებულებს აშველებდა.
საპატრიარქოსთან მიმდინარე აქციაზე გუშინ ფიზიკური დაპირისპირება მოხდა. აქციის მონაწილეები პატრიარქის ეპისტოლეში სუროგაციასთან და ხელოვნურ განაყოფიერებასთან დაკავშირებულ ჩანაწერს აპროტესტებდნენ. აქციაზე გამოჩნდნენ პატრიარქის ეპისტოლეს მომხრეები. მხარეებს შორის დაპირისპირება მოხდა, მათ შორის ფიზიკური, რაც პოლიციამ განმუხტა. შემთხვევის შედეგად ოთხი პირი აიყვანეს.
09.01.14
Discussion about this post