თბილისის საკრებულოს უმცირესობის წარმომადგენლებმა დღეს საკრებულოში ბრიფინგი გამართეს, რომელზეც დედაქალაქის 2014 წლის ბიუჯეტის არმიღების გამო წარმოქმნილ პრობლემებზე ისაუბრეს.
ფრაქციის “ნაციონალური მოძრაობა–განახლებული თბილისი’’თავმჯდომარის განცხადებით,ბოლო დღეებში საკრებულოში უმრავლესობის წარმომადგენლების მხრიდან ბიუჯეტის ჩავარდნასთან დაკავშირებით ზედაპირული შეფასებები ისმის.
“მინდა გითხრათ, რომ ბოლო დღეების განმავლობაში ჩვენი კოლეგების მხრიდან ბიუჯეტის ჩავარდნასთან დაკავშირებით ძალიან ზედაპირული, არაპროფესიონალური შეფასებები ისმის. ისტორიკოსი ბატონი სამუშია საზოგადოებაში ძალიან ბევრ არასწორ ინფორმაციას ავრცელებს.
მინდა შევახსენო ჩემს კოლეგებს საბიუჯეტო 78 მუხლის მე-7 პუნქტი, სადაც აშკარად მითითებულია, რომ თითოეულ პრიორიტეტზე ყოველთვიურად უნდა გაიცეს თანხა არაუმეტეს გასული საბიუჯეტო ასიგნირების ერთი მეთორმეტედისა. აქ საუბარია პრიორიტეტებზე, პროგრამებზე და არა მთლიან თანხაზე.
ბატონმა სამუშიამ ისიც კი განაცხადა, რომ თურმე წინა წელს დარჩენილი 100 მილიონი შესაძლებელია 2014 წელს დაიხარჯოს. ეს არის აბსურდული და უპასუხისმგებლო განცხადება, რომელსაც მოსახლეობა შეცდომაში შეჰყავს’’,–განაცხადა თამაზ შოშიაშვილმა.
მან ასევე “ქართული ოცნების’’ წარმომადგენელთა ის განცხადებებიც გაიხსენა, რომლის თანახმად, ქვეყნის ეკონომიკას არანაირი საფრთხე არ ემუქრება.
“ჩვენთვის “ქართლი ოცნების’’ რიტორიკა ცნობილია. გვახსოვს განცხადებები, რომ 2013 წლის ბიუჯეტის შესრულებას პრობლემები არ აქვს, თუმცა აღმოჩნდა, რომ ქვეყნის ბიუჯეტი მილიარდი ლარით გაირღვა. ახლა კი ასევე “ქართული ოცნების’’ მხრიდან ვისმენთ, რომ დედაქალაქის ბიუჯეტის ჩაგდებას არანაირი პრობლემა არ შეიძლება მოყვეს, რაც ჩვენი თანამოქალაქეების მიმართ აბსოლუტურად უპასუხისმგებლო, ზედაპირული და არაპროფესიონალური დამოკიდებულება’’,–მიიჩნევს თამაზ შოშიაშვილი.
თბილისის ბიუჯეტის პროექტის სამჯერ ჩავარდნის შემთხვევაში, კანონის თანახმად, ფედერალური მმართველობა უნდა შეიქმნას.
ამის შესახებ ამავე ბრიფინგზე საკრებულოს ფრაქციის “ნაციონალური მოძრაობა – რეფორმატორები” თავმჯდომარემ თემურ გრიგალაშვილმა განაცხადა.
მისივე თქმით, ირაკლი შიხიაშვილი და უმრავლესობა 2014 წლის ბიუჯეტის პროექტის დამტკიცებას არ აპირებენ.
გრიგალაშვილის განცხადებით, ბიუჯეტის სამი თვის განმავლობაში ზედიზედ სამჯერ ჩავარდნის შემთხვევაში, კანონის თანახმად, მოხდება საკრებულოს დაშლა და ფედერალური მმართველობის დამყარება.
“საკრებულოს თავმჯდომარეს ირაკლი შიხიაშვილს დედაქალაქის მერიაში ხელისუფლების უზურპაცია და ძალაუფლების ხელში ჩაგდება სურს. ეს არის დედაქალაქის მოსახლეობის, მოქალაქეების ინტერესების წინააღმდეგ მიმართული ქმედება და ამას მავნებლობა ჰქვია’’,–აღნიშნა გრიგალაშვილმა.
საკრებულოს უმცირესობის განცხადებით, უახლოეს მომავალში ისინი მერიის საქალაქო სამსახურის უფროსებთან და გამგებლებთან ერთად ყველა შესაძლო პრობლემების დეტალურად შესწავლასა და განხილვას შეუდგებიან.
15.01.14
Discussion about this post