კახა კალაძე ქსელების გაუმჯობესებისთვის “ენერგო-პრო ჯოჯრიასგან” გეგმის წარმოდგენას ითხოვს

საქართველოს ენერგეტიკის მინისტრი კახა კალაძე ქსელების გაუმჯობესებისთვის “ენერგო-პრო ჯოჯრიასგან” კონკრეტული გეგმის წარმოდგენას კატეგორიულად ითხოვს. როგორც კახა კალაძემ კომპანიის წარმომადგენლებთან დღევანდელი შეხვედრის შემდეგ ჟურნალისტებს განუცხადა, კონტრაქტით განსაზღვრული ვალდებულებაა, რომ საქართველოს მოსახლეობას 24-საათიან რეჟიმში მიეწოდებოდეს ელექტროენერგია. “რეგიონებში ქსელთან დაკავშირებით გვაქვს რთული მდგომარეობა. ამაზე არაერთხელ გამიკეთებია განცხადება. ამინდის ერთ ცვლილებაზე ხდება ელექტროენერგიის გათიშვა, განსაკუთრებით იქ, სადაც ძალიან მძიმე მდგომარეობა გვაქვს ქსელის კუთხით. ეს პრობლემები არ დაწყებულა დღეს და გუშინ, წლებია, ეს პრობლემები არსებობს ქსელში”, – განაცხადა კახა კალაძემ. მისივე თქმით, თუ წინა ხელისუფლება თვალს ხუჭავდა ამ ყველაფერზე, ის არ აპირებს, იმავეს განმეორებას. “ჩვენი მხრიდან კატეგორიული მოთხოვნაა, რომ წარმოდგენილ იქნას გეგმა “ენერგო-პრო ჯორჯიაში” ქსელების რეაბილიტაციის მიზნით ინვესტიციების განხორციელების კუთხით, რათა ელექტროენერგიის გათიშვა მინიმუმადე იყოს დაყვანილი”, – განაცხადა კახა კალაძემ. გეგმის წარმოდგენასთან დაკავშირებით დღევანდელ შეხვედარზე კახა კალაძე სემეკი-ს თავმჯდომარესაც მიმართა. 16.01.14