დავით ზალკანიანმა საქართველოში ჩინეთის ელჩი მიიღო

საქართველოს საგარეო საქმეთა მინისტრის პირველმა მოადგილემ დავით ზალკალიანმა მიიღო საქართველოში ჩინეთის სახალხო რესპუბლიკის საგანგებო და სრულუფლებიანი ელჩი იუე ბინი.

მხარეებმა მიმოიხილეს საქართველოსა და ჩინეთს შორის არსებული ორმხრივი ურთიერთობები ისევე როგორც მიმდინარე აქტუალური საკითხები. გამოითქვა კმაყოფილება ჩინეთსა და საქართველოს შორის სავაჭრო-ეკონომიკურ ურთიერთობებში არსებულ პოზიტიურ დინამიკასთან დაკავშირებით და ხაზი გაესვა ჩინეთიდან საქართველოში ინვესტირების კუთხით არსებულ უდიდეს პოტენციალს.

განხილულ იქნა ასევე 2014 წლის განმავლობაში მხარეებს შორის სხვადასხვა დონის ვიზიტების გაცვლის საკითხები და მნიშვნელობა.

მინისტრის პირველმა მოადგილემ ჩინეთის ელჩს მიაწოდა ინფორმაცია 2013 წლის 18 დეკემბერს გამართული ჟენევის საერთაშორისო მოლაპარაკებების რიგით 26-ე რაუნდის შესახებ. საუბარი შეეხო ასევე საოკუპაციო ხაზის გასწვრივ რუსეთის საოკუპაციო ძალების მხრიდან მავთულხლართებისა და ხელოვნური ბარიერების აღმართვის ფაქტებს და შედეგად ადამიანის უფლებების დარღვევის კუთხით შექმნილ მძიმე ვითარებას.

დავით ზალკალიანმა ასევე მიაწოდა ინფორმაცია ელჩს საქართველოს საგარეო პოლიტიკური პრიორიტეტების შესახებ, მათ შორის საქართველოს მიერ ევროკავშირთან ურთიერთობებში მიღწეულ პროგრესზე. ხაზი გაესვა საქართველოს მიერ ევროკავშირთან ასოცირების შესახებ შეთანხმების პარაფირების მნიშვნელობას, ღრმა და ყოვლისმომცველი თავისუფალი სავაჭრო სივრცის ჩათვლით.

ჩინეთის ელჩმა კვლავ დაადასტურა ჩინეთის მტკიცე მხარდაჭერა საქართველოს სუვერენიტეტისა და ტერიტორიული მთლიანობისადმი.

21.01.14