მომიტინგეებზე შეტევის შემდეგ “ბერკუტმა” უკან, ძველ პოზიციებზე დაიხია. ამის შესახებ უკრაინული მედია იუწყება. გავრცელებული ინფორმაციით, ძალოვანებმა კიევის “დინამოს” სტადიონის პირდაპირ აღმართული ბარიკადები მოშალეს. ამ დროისთვის დემონსტრანტებსა და ძალოვანებს ერთმანეთისგან რამდენიმე გადამწვარი ავტობუსი და სატვირთო ავტომობილი ჰყოფთ.
უკრაინული წყაროების ცნობით, გრუშევსკის ქუჩაზე ამ დროისთვის რამდენიმე ასეული მომიტინგეა, რომლებიც ძალოვანებს ქვებს უშენენ. თავის მხრივ, ძალოვანები დემონსტრანტების მისამართით ცრემლსადენ გაზს იყენებენ.
ამასთან, დღეს დილით უკრაინულ მედიაში გავრცელდა ინფორმაცია ორი დაღუპული აქტივისტის შესახებ, რომელთაგან ერთი ცეცხლსასროლი იარაღით მიყენებული ჭრილობებით გარდაიცვალა.
ამასთან, კიევში სამართალდამცავებსა და მომიტინგეებს შორის შეტაკებები 19 იანვარს დაიწყო. ევრომაიდანზე შეკრებილების უკმაყოფილება რადას მიერ 16 იანვარს მიღებულმა კანონებმა გამოიწვია, რომელიც საპროტესტო აქციების გამართვის წესებს ამკაცრებს.
22.01.14
Discussion about this post