თბილისის საკრებულოს ფრაქცია ” ქართული ოცნება – თბილისელების” თავჯდომარე არასამათავრობო ორგანიზაციებს თბილისის ბიუჯეტის პროექტის განხილვისა და მიღების პროცესში ჩართულობისაკენ მოუწოდებს.
როგორც გულიკო ზუმბაძემ საკრებულოში გამართულ ბრიფინგზე აღნიშნა, ქვეყანაში დემოკრატიის ხარისხი გადაწყვეტილების მიღების პროცესში საზოგადოების ჩართულობის მაჩვენებლით განისაზღვრება და ბიუჯეტის პროექტის მიღებასთან დაკავშირებით ბოლო დროს შექმნილი ვითარებაც, სწორედ საზოგადოების ფართო ფენების მონაწილეობის არარსებობითაა გამოწვეული.
“იქ, სადაც ეს მაჩვენებელი მაღალია, დაცულია პროცესის ყველა დემოკრატიული პრინციპი: მონაწილეობა, გამჭვირვალობა და ანგარიშვალდებულება. შესაბამისად, მიიღება ობიექტური და სამართლიანი გადაწყვეტილებები.
სამწუხაროდ, დღემდე, დედაქალაქის მთავარი დოკუმენტის მიღების გადაწყვეტილების პროცესში დარღვეულია ეს პრინციპები, რასაც აგრეთვე ითვლისწინებს საქართველოს საბიუჯეტო კოდექსის მე–4 მუხლიც.
შექმნილი ვითარებიდან გამომდინარე, საჭიროდ მიმაჩნია, მოვუწოდო არასამთავრობო ორგანიზაციებს, დაინტერესებულ პირებს და ექსპერტებს აქტიურად ჩაერთონ თბილისის ბიუჯეტის პროექტის განხილვაში, დამტკიცებასა და შემდგომ უკვე შესრულების კონტროლის განხორციელებაში.
დროა, ეს პროცესები გასცდეს თბილისის საკრებულოსა და მერიის კედლებს და გამოიხატოს ფართო ფენების დამოკიდებულება, როგორც ბიუჯეტის, ისე თვითმმართველობაში შექმნილი ყველა მოვლენების მიმართ“,- განაცხადა გულიკო ზუმბაძემ.
მისივე თქმით, აუცილებელია საკრებულოს საიტზე სასწრაფოდ მოხდეს ბიუჯეტის პროექტის განთავსება და საჯარო განხილვების მოწყობა.
“დღეს არ შეიძლება გულგრილი იყოს საზოგადოება, გარედან უყუროს და შეაფასოს მოვლენების განვითარება, ვინაიდან, შესაძლოა, პროცესები იმგვარად განვითარდეს, რომ დაზარალდეს ჩვენი, ჯერ კიდევ, ფეხაუდგმელი ადგილობრივი დემოკრატია და დაზარალდნენ თბილისელები“,- აღნიშნა ქრაციის თავმჯდომარემ.
23.01.14
Discussion about this post