პირველი შეთანხმება ორთვიანი აქციების შემდეგ – უკრაინის პრეზიდენტი თანახმაა, 16 იანვარს საპროტესტო აქციების შესახებ მიღებულ სადავო კანონებში ცვლილებები შევიდეს და ხელისუფლების პასუხისმგებლობის საკითხის განხილვა დაიწყოს.
ინფორმაციას მედიისთვის იუსტიციის მინისტრი ავრცელებს, რომელიც ოპოზიციასთან მოლაპარაკებების მიზნით შექმნილი სამუშაო ჯგუფის წევრია.
მთავრობა ამნისტიის გამოსაცხადებლად და აქციების დროს დაკავებულთა გასათავისუფლებლადაც მზად არის, თუმცა მხოლოდ იმ შემთხვევაში, თუ დემონსტრანტები ყველა დაკავებულ ადმინისტრაციულ შენობასა და ცენტრალურ გზებს გაათავისუფლებენ. ასეთია მოლაპარაკებათა მორიგი 4-საათიანი რაუნდის შედეგი.
კონსულტაციების შემდეგ ოპოზიციის ლიდერთა 5-პუნქტიანი მემორანდუმი დღეს რადას სხდომაზე გადის. პარლამენტში სხდომა ამ წუთებში იწყება, რის გამოც საკანონმდებლო ორგანოსთან უსაფრთხოების განსაკუთრებული ზომებია მიღებული.
სავარაუდოდ, სწორედ დღევანდელ სხდომაზე უნდა მოხდეს ოპოზიციის მოთხოვნათა ერთი ნაწილის დაკმაყოფილება. რადას გადაწყვეტილებამდე კიევში საპროტესტო გამოსვლები გრძელდები.
შეთანხმების მიუხედავად, უკრაინა ევროპელი ლიდერების ყურადღების ცენტრში რჩება. ევროკავშირის უმაღლესი წარმომადგენელი კიევს დაგეგმილზე ორი დღით ადრე ესტუმრება. ვიზიტამდე კი კეთრინ ეშტონი საგანგებო მიმართვას ავრცელებს.
განცხადებაში კეტრინ ეშტონი შეშფოთებას გამოთქვამს იმის გამო, რომ ხელისუფლება საგანგებო მდგომარეობის გამოცხადებას აპირებს. ეშტონის აზრით, ამ ნაბიჯით სარგებელს ვერც ერთი მხარე ვერ ნახავს. ქეთრინ ეშტონთან ერთად უკრაინაში ჩავა შტეფან ფულეც. ეს ბოლო ერთ კვირაში კიევში ევროკომისრის უკვე მეორე ვიზიტი იქნება.
პარალელურად, ცნობილი ხდება, რომ უკრაინაში შექმნილ ვითარებაზე მორიგი სატელეფონო საუბარი შედგა ვიქტორ იანუკოვიჩსა და ჯო ბაიდენს შორის. ამერიკის ვიცე-პრეზიდენტმა უკრაინის პირველ პირს მოუწოდა, საგანგებო მდგომარეობის გამოცხადებაზე უარი თქვას და ქუჩებიდან მილიცია გაიყვანოს.
28.01.14
Discussion about this post