საკანონმდებლო ორგანოს წევრები შ.პ.ს. “ყაზტრანსგაზის’’ წარმომადგენლებს შეხვდნენ და აბონენტების გარკვეული ნაწილის ქვითრებზე დარიცხულ გადასახებზე განმარტება მოისმინეს.
როგორც შეხვედრის ინიციატორმა, საკრებულოს თავმჯდომარის პირველმა მოადგილემ გიორგი მუსხელიშვილმა განაცხადა, მოლაპარაკებების შედეგად გადაწყდა, რომ შეიქმნება სამუშაო ჯგუფი, რომელიც მოსახლეობის პრობლემებს შეისწავლის და დეტალურად განიხილავს, თუ რამდენად სწორად მოხდა აბონენტებზე დავალიანების დარიცხვა იანვრის თვეში.
”სამუშაო ჯგუფში შევლენ, როგორც კომპანიის, ასევე საკრებულოს შესაბამისი კომისიების წარმომადგენლები და მუშაობა გაგრძელდება მანამ, სამან არ მოგვარდება ყველა პრობლემა.
მოქალაქეებს ასევე უფლება აქვთ მიმართონ კომპანიის სერვის ცენტრებს, სადაც მათ შესაძლებლობა ექნებათ ინდივიდუალურად მიიღონ დეტალური ინფორმაცია. გაუგებრობის შემთხვევაში კი აბონენტებს შეუძლიათ მოგვმართონ საკრებულოს მუშა ჯგუფს და ჩვენ გპირდებით, განვიხილავთ აღნიშნულ პრობლემას და ერთობლივად ვიმუშავებთ მის აღმოსაფხვრელად“,- განაცხადა გიორგი მუსხელიშვილმა.
შეხვედრაზე მხარეებმა გაზის ხარისხის შესახებაც იმსჯელეს.
საკრებულოს ურბანული დაგეგმარებისა და საქალაქო მეურნეობის კომისიის თავმჯდომარის, ნიკოლოზ ხაჩირაშვილის თქმით, მუშა ჯგუფის უპირველესი ამოცანა სწორედ ბუნებრივი აირის მიწოდების ხარისხის კონტროლი იქნება.
“აუცილებელია, რომ არცერთმა ჩვენმა თანამოქალაქემ არ გადაიხადოს იმაზე მეტი, რაც უშუალოდ დახარჯა. ინდივიდუალურ რეჟიმში გავივლით ყველა საკითხს და თუ ვინმე თვლის, რომ ამ ორი თვის მანძილზე დაერიცხათ გაცილებით მეტი თანხა, ამ შემთხვევას მკაცრ კონტროლზე ავიყვანთ. და ბოლოს, ჩვენი უპირველესი ამოცანა იქნება გაზის მიწოდების ხარისხზე კონტროლი“,- აღნიშნა ნიკოლოზ ხაჩირაშვილმა.
როგორც კომპანია “ყაზტრანსგაზ-თბილისის“ სპეციალურმა მმართველმა ირაკლი გაბუნიამ განაცხადა, გაზის ხარისხი ყველა შესაბამის სტანდარტს აკმაყოფილებს და დასძინა, რომ კომპანიას აღებული აქვს ვალდებულება, ყველა დაინტერესებულ ორგანოს წარუდგინოს შესაბამისი მასალა, რომელიც დაადასტურებს, რომ თბილისი მოიხმარს ხარისხიან გაზს.
თბილისელები რამდენიმე დღეა ბუნებრივი აირის გაორმაგებულ გადასახადს აპროტესტებენ. როგორც მოსახლეობა აცხადებს, მათ ქვითრებში ასახულია თვენახევრის ან ორი თვის ხარჯი, რაც მათ ფინანსურ პრობლემებს კიდევ უფრო ამძიმებს.
04.01.14
Discussion about this post