პარლამენტში საგაზაფხულო სესიის პირველი პლენარული სხდომა მიმდინარეობს. სხდომა საქართველოს ჰიმნით გაიხსნა.
პარლამენტი დღეს თვითმმართველობის კოდექსზე მუშაობას დაასრულებს და შესაბამის საკანონმდებლო პაკეტს მესამე მოსმენით უყრის კენჭს. მანამდე კი, მეორე მოსმენით თვითმმართველობის კოდექსის პროექტის ღიად დარჩენილი მუხლი გავა, რომელიც თვითმმართველობების აპარატში საშტატო ერთეულების განსაზღვრას ეხება და საკადრო ოპტიმიზაციას იწვევს. თვითმმართველობის ორგანოებში საშტატო რიცხოვნობასთან დაკავშირებული მუხლი პარლამენტმა რიგგარეშე სხდომაზე მეორე მოსმენით არ მიიღო – დეპუტატები ახალ ფორმულირებაზე შეჯერდნენ.
თვითმმართველობის კოდექსის განხილვის პროცესი პარლამენტში დღის მეორე ნახევარში, შესვენების შემდეგ განახლდება.
დღევანდელი სხდომის დღის წესრიგშია სხვა საკანონმდებლო ინიციატივები, რომელთა განხილვაც პარლამენტმა საშემოდგომო სესიაზე დაიწყო.
პარლამენტში ამ წუთებში პოლიტიკური განცხადებები კეთდება.
05.01.14
