მადლობა პარლამენტის თავმჯდომარეს და თითოეულ დეპუტატს იმ სამუშაოს გამო, რომელიც მათ გაწიეს წელწადნახევრის განმავლობაში , – ამის შესახებ საქართველოს პრეზიდენტმა გიორგი მარგველაშვილმა პარლამენტში, სიტყვით გამოსვლისას განაცხადა. მისივე თქმით, მნიშვნელოვანია, რომ მისი გამოსვლა დაემთხვა კონსტიტუციის პირველ დღეს.
“ჩემთვის მნიშვნელოვანია, რომ მე გამოვდივარ თქვენს წინაშე. მნიშვნელოვანია, რომ ეს ხდება 21 თებერვალს, საქართველოს პირველი კონსტიტუციის დღეს და იმ დღეს, როდესაც ბიძინა ივანიშვილმა კოალიცია “ქართული ოცნება” წარმოუდგინა საზოგადოებას. მინდა პატივისცემა გამოვხატო ამ პარლამენტის მიმართ, მადლობა ვუთხრა თავმჯდომარეს და დეპუტატებს იმ სამუშაოს გამო, რომელიც იქნა გაწეული გასული წელიწადნახევრის განმავლობაში”, – აღნიშნა მარგველაშვილმა.
მანვე ისაუბრა ახალი კონსტიტუციით განსაზღვრულ მის უფლებამოვალეობებზე.
“2013 წელს, ნოემბერში ამოქმედდა ახალი კონსტიტუცია, რომლის ფარგებშიც შეიცვალა პრეზიდენტის უფლებამოვალეობები. ახალი პრეზიდენტი არ არის ყველასა და ყველაფრის ხელმძღვანელი, არამედ სრულიად ახალ უფლებამოვალეობებს ახორციელებს. კონსტიტუციის ახალი რედაქციის დაფუძნებისას და მის პრაქტიკაში გატარებისას უმნიშვნელოვანესია გვახსოვდეს, რომ ჩვენ ვაფუძნებთ ახალ პრაქტიკას, იმას რაც მომავალშიც იმოქმედებს. ამიტომ, მე მინდა, რომ ჩვენ ამ პროცესში ვიყოთ უაღრესად პრინციპულნი და ფრთხილად შევქმნათ ახალი კონსტიტუციური წონასწორობა და შტოებს შორის ძალაუფლების სწორი ბალანსი”, – აღნიშნა მარგველაშვილმა.
მისივე თქმით, მისი პრიორიტეტი იყო და არის, იხელმძღვანელოს მხოლოდ კონსტიტუციით, გადადგას ფრთხილი, მაგრამ პრინციპული ნაბიჯები ხელისუფლების სხვადასხვა შტოებთან მიმართებაში.
“ჩვენი გამოწვევა არის დღეს, ავაგოთ ხელისუფლების წონასწორობით ისეთი სისტემა, რომელიც უზრუნველყოფს საქართველოს სტაბილურ განვითარებას”, – აღნიშნა მარგველაშვილმა.
21.02.14
Discussion about this post