საქართველოს საგარეო საქმეთა სამინისტრო ღრმა მწუხარებას გამოთქვამს რევაზ ადამიას გარდაცვალების გამო. მრავალმხრივი საზოგადოებრივი მოღვაწეობის განმავლობაში, მათ შორის, დიპლომატიურ ასპარეზზეც, რევაზ ადამია გამოირჩეოდა განსაკუთრებული ერუდიციით, პროფესიონალიზმით და უაღრესად მაღალი პასუხისმგებლობით.
რევაზ ადამიას გარდაცვალებით ქართულმა დიპლომატიამ და მთლიანად ქართულმა საზოგადოებამ აუნაზღაურებელი დანაკლისი განიცადა.
რევაზ ადამია გახლდათ საქართველოს საგანგებო და სრულუფლებიანი ელჩი, 2002-2006 წლებში საქართველოს მუდმივი წარმომადგენელი გაერთიანებული ერების ორგანიზაციაში.
1993-1995 წლებში რევაზ ადამია იყო საქართველოს პარლამენტის თავდაცვისა და უშიშროების კომისიის მდივანი, ხოლო 1995-2002 წლებში საქართველოს პარლამენტის თავდაცვისა და უშიშროების კომიტეტის თავმჯდომარე. 1999-2001 წლებში არჩეულ იქნა ევროპის საბჭოს საპარლამენტო ასამბლეის ვიცე პრეზიდენტად.
1992-2001 წლებში რევაზ ადამია იყო რუსეთის სამხედრო ბაზების საქართველოდან გაყვანის მოლაპარაკებებში საქართველოს სახელმწიფო დელეგაციის წამყვანი წევრი და 1999 წლის სტამბოლის ეუთოს სამიტზე მიღებული უმნიშვნელოვანესი გადაწყვეტილებების ერთ-ერთი აქტიური მონაწილე.
საქართველოს საგარეო საქმეთა სამინისტრო თანაუგრძნობს რევაზ ადამიას ოჯახის წევრებსა და მის ახლობლებს.
05.03.14
Discussion about this post