საქართველოს მორაგბეთა ეროვნულმა ნაკრებმა რუმინეთის ნაკრები ანგარიშით 22:9 დაამარცხა. მატჩი მიხეილ მესხის სტადიონზე გაიმართა.
საქართველომ და რუმინეთმა 2014 წლის ევროპის ერთა თასისა და 2015 წლის მსოფლიო თასის ევროპული საკვალიფიკაციო რაუნდის ფინალური შეხვედრა ჩაატარეს.
ამ გამარჯვებით საქართველოს ნაკრებმა ევროპის ერთა თასი და ანთიმოზ ივერიელის თასი მოიპოვა. გარდა ამისა, განისაზღვრა 2015 წელს, ინგლისში გასამართ მსოფლიო თასზე C და D ჯგუფებში მონაწილე გუნდები.
“ბორჯღალოსნები” სასურველ C ჯგუფში მოხვდნენ, სადაც მეტოქეებად ახალი ზელანდიის, არგენტინისა და ტონგას ნაკრებებთან ერთად, აფრიკის კონტინენტის შესარჩევ ეტაპზე გამარჯვებული ეყოლებათ.
შეხვედრას საქართველოს პრემიერ-მინისტრი ირაკლი ღარიბაშვილი, ყოფილი პრემიერ-მინისტრი ბიძინა ივანიშვილი და საქართველოში ვიზიტით მყოფი რუმინეთის პრემიერ-მინისტრი ვიქტორ პონტა დაესწრნენ.
15.03.14