საქართველოს საგარეო საქმეთა მინისტრი მაია ფანჯიკიძე 19 მარტს საქართველოში ამერიკის სავაჭრო პალატის წევრი კომპანიების წარმომადგენლებს შეხვდება.
შეხვედრა სასტუმრო „შერატონ მეტეხი პალასში“ გაიმართება და მას 70-ზე მეტი ამერიკული, საერთაშირისო და ქართული კომპანიების, ასევე დიპლომატიური კორპუსის წარმომადგენლები დაესწრებიან. ღონისძიებას უმასპინძლებს ამერიკის სავაჭრო პალატის პრეზიდენტი სარა უილიამსონი.
შეხვედრაზე საგარეო საქმეთა მინისტრი მაია ფანჯიკიძე კიდევ ერთხელ მიმოიხილავს საქართველოს პრემიერ-მინისტრის ვიზიტს შეერთებულ შტატებში და საქართველოსა და ამერიკის შეერთებულ შტატებს შორის სხვადასხვა სფეროში ორმხრივი ურთიერთობების განვითარების პერსპექტივებზე ისაუბრებს.
ამერიკის სავაჭრო პალატა ერთ-ერთი ყველაზე დიდი ბიზნეს-ასოციაციაა საქართველოში, რომელიც სხვადასხვა სექტორიდან 150-ზე მეტ კომპანიას აერთიანებს. იგი 1998 წელს დაარსდა და მიზნად ისახავს ხელი შეუწყოს ამერიკასა და საქართველოს შორის ურთიერთობების გაღრმავებას და ბიზნეს-კლიმატის გაუმჯობესებას საქართველოში.
18.03.14
