ევროკავშირი-საქართველოს საპარლამენტო თანამშრომლობის კომიტეტი ქვეყანას მოუწოდებს, არ გაჩნდეს განცდა პოლიტიკურად მოტივირებული შერჩევითი სამართლის შესახებ. ასეთი რეკომენდაცია დაფიქსირებულია კომიტეტის მიერ მიღებულ დოკუმენტში, რომელიც დღეს დაამტკიცეს.
დოკუმენტში არის მოწოდება, რომ ყველა პოლიტიკურმა ძალამ თავი აარიდოს პოლიტიკური ანგარიშსწორების, ან პოლიტიკურად მოტივირებული შერჩევითი სამართლის ეჭვის გაჩენას. დოკუმენტში პოლიტიკური ძალებისადმი ასევე არის რეკომენდაცია ერთად თანამშრომლობის შესახებ.
ამასთან, რეკომენდაციების დოკუმენტის მიღების შემდეგ გამართულ პრესკონფერენციაზე, ევროკავშირი-საქართველოს საპარლამენტო თანამშრომლობის კომიტეტის თანათავმჯდომარემ, მილან ცაბრნოხმა ჟურნალისტის კითხვის პასუხად განმარტა, რომ მიხეილ სააკაშვილის დაკითხვაზე დაბარების თემა და რაიმე კონკრეტული საქმე მსჯელობის საგანი არ ყოფილა.
“ჩვენ კონკრეტულ საქმესთან დაკავშირებით კონკრეტული პოზიცია არ გვაქვს, მაგრამ ვაღიარებთ, რომ საზოგადოება დიდი ინტერესით აკვირდება ამ მოვლენებს. კონკრეტული თემები კონკრეტულ ადამიანებთან დაკავშირებით ჩვენ არ განგვიხილია. გვესმის სამართლიანობის მნიშვნელობა. ჩვენ ყველა ქართველ პოლიტიკოსს, მთელ პოლიტიკურ სპექტრს მოვუწოდებთ, თავი აარიდონ პოლიტიკურად მოტივირებულ შერჩევით სამართალს და ერთად იმუშაონ”, – განაცხადა მილან ცაბრნოხმა დასმული კითხვის პასუხად.
26.03.14