საქართველოს პრემიერ-მინისტრი ირაკლი ღარიბაშვილი ევროპარლამენტის სოციალ-დემოკრატთა პროგრესული ალიანსის ფრაქციის თავმჯდომარე ჰანეს სვობოდას შეხვდა.
პრემიერის პრესსამსახურის ინფორმაციით, მთავრობის ადმინისტრაციაში გამართულ შეხვედრაზე მხარეებმა საქართველო–ევროკავშირის ურთიერთობის საკითხები განიხილეს.
საუბარი შეეხო აღმოსავლეთ პარტნიორობის პროგრამის ფარგლებში მიმდინარე პროცესებს. გამოითქვა იმედი, რომ ივნისის თვეში საქართველო ხელს მოაწერს ევროკავშირთან ასოცირების ხელშეკრულებას.
პრემიერ–მინისტრმა სტუმარს ქვეყანაში მიმდინარე რეფორმები გააცნო და აღნიშნა, რომ საქართველოს ევროკავშირთან დაახლოების სამოქმედო გეგმა ქვეყნის პოლიტიკური, სოციალური და ეკონომიკური ცხოვრების თითქმის ყველა სფეროს მოიცავს.
მხარეებმა ასევე ისაუბრეს ქართულ–რუსულ ურთიერთობებზე და ოკუპირებულ რეგიონებში არსებულ ვითარებაზე.
შეხვედრას ევროპარლამენტის სოციალ-დემოკრატების პროგრესული ალიანსის ფრაქციის სპიკერი სელინ ბაიერი, ევროკავშირის ელჩი საქართველოში ფილიპ დიმიტროვი, საქართველოს ვიცე–პრემიერი კახა კალაძე და ფრაქცია “ქართული ოცნების” თავმჯდომარე გიორგი ვოლსკი დაესწრნენ.
“საუბრის ძირითადი თემები იყო საქართველოსა და ევროკავშირს შორის ასოცირების შეთანხმების გაფორმება, საქართველოსა და ევროკავშირის შემდგომი დაახლოება, რეფორმები, გეოპოლიტიკური ვითარება. ჩვენთვის, ევროპელებისთვის საქართველო არის ძალიან მნიშვნელოვანი პარტნიორი რეგიონში. ჩვენ მხარს ვუჭერთ რეფორმების პროცესს ქვეყანაში და ეკონომიკურ-პოლიტიკური კავძშირების გაძლიერებას საქართველოსა და ევროკავშირს შორის”, – განაცხადა ჰანეს სვობოდამ შეხვედრის დასრულების შემდეგ.
სოციალ-დემოკრატების პროგრესული ალიანსი ევროპარლამენტის სიდიდით მეორე ფრაქციაა. იგი ძირითადად ევროპის სოციალისტთა პარტიის წევრებით არის დაკომპლექტებული და ევროკავშირის 27 ქვეყნის სოციალისტურ, სოციალ-დემოკრატიულ და მშრომელთა პარტიებს აერთიანებს.
31.03.14
Discussion about this post