მოსალოდნელია თუ არა ლუდზე ფასების ცვლილება

ცხელი სეზონის მოახლოვებასთან ერთად უფრო აქტუალური ხდება ლუდის თემაც. ”თბილისი თაიმსი” შეეცადა გაერკვია თუ რა არჩევანს სთავაზობენ ლუდის მწარმოებელი კომპანიები მომხმარებლებს, რა ფასად შეძლებენ ლუდის მოყვარულები სასმელის შეძენას და იგეგმება თუ არა ფასების ცვლილება ამ სეზონზე.

გამოიკითხა ლუდის მწარმოებელი 4 კომპანია. გამოკითხული ყველა კომპანია აცხადებს, რომ ამ სეზონზე ფასების ცვლილებას არ უნდა ველოდოთ. როგორც გამოკითხული რესპოდენტები აცხადებენ, ახალი ხელისუფლების პირობებში გარემო ბიზნესის კეთების კუთხით არ შეცვლილა.

ყაზბეგი:  ” ჩვენი კომპანია მომხმარებელს ლუდზე მინიმალურ ფასს ლარს და 15 თეთრს სთავაზობს, ხოლო მაქსიმალურს კი -3 ლარი და 45 თეთრია, სეზონზე ფასების ცვლილება არ იგეგმება თუ რაიმე გლობალური ცვლილება არ მოხდა, თუ ბაზარზე ნედლეულის ფასი იგივე დარჩება, შესაბამისად ჩვენი ფასიც უცვლელი იქნება. ლუდის მოყვარულებს ყაზბეგი ამ სეზონზეც შესთავაზებს სიახლეებს, რომელიც რამდენიმე კვირაში გახდება ცნობილი.  ჩემი ინფორმაციით, საქართველოს ლუდის ბაზარზე 15%-იანი წილი უჭირავს იმპორტირებულ პროდუქტს,  შესაბამისად ის დიდ კონკურენციას უწევს ქართული წარმოების ლუდს და თავის ნიშას იკავებს ბაზარზე, მიუხედავად ამისა მთავარი კონკურენტები ბაზარზე მაინც ქართული ლუდის კომპანიები ვართ. ყაზბეგის ლუდი იმპორტირდება მსოფლიოს 16 ქვეყანაში, მათ შორის აშშ-ში, საბერძნეთში, კვიპროსზე, გერმანიაში, ავსტრიაში, დიდ ბრიტანეთსა და ირლანდიაში. გარემო ბიზნესის კეთების კუთხით არ შეცვლილა, გაყიდვებმა კი იმატა. საქართველოს ლუდის ბაზარზე ყაზბეგს დაახლოებით 8% უჭირავს.

ზედაზენი:  “გასაყიდი ფასი დისტრიბუტორებისთვის სხვადასხვაა ამიტომ ჩვენ თავს შევიკავებთ კონკრეტული ცოფრების დასახელებისგან, თუმცა დანამდვილებით შეგვიძლია ვთქვათ, რომ ამ სეზონზე ლუდის ფასი არ შეიცვლება.ზედაზენი მუდმივად სთავაზობს მომხმარებლებს სიახლეებს და არც ეს სეზონი იქნება გამონაკლისი ამ კუთხით, ჩვენ ამ სეზონზეც შევთავაზებთ  მომხამრებლებს სიახლეებს, მათი მოთხოვნების გათვალისწინებით. იმპორტირებული ლუდი რა თქმა უნდა უწევს კონკურენციას ადგილობრივი წარმობის ლუდს, ზედაზენი კი იმპორტს ახორციელებს  მსოფლიოს 21 ქვეყანაში, მათ შორის  აზერბაიჯანში, თურქეთში, ტაჯიკეტში, ყაზახეთში, რუსეთში, სომხეთში ბელორუსიაში, ყირგიზეთში, კვიპროზე, სირიაში, პოლონეთში. საცდელი პარტია გავუშვით გერმანიაში. უახლოეს მომავალში კი ვგეგმავთ გავიდეთ ერაყის, ირანისა და გაერთიანებული საემიროების ბაზარზე. მოგეხსენებათ, უკვე მეშვიდე თვეა ჩვენს ქარხანასა და ზოგადად ჰოლდინგში შემავალ ყველა კომპანიას ყადაღა ადევს, ვთვლით, რომ ახლაც და წინა წლებშიც ყოველთვის არსებობდა პრეცენდენტი, რომ ხელისუფლება ერეოდა ბიზნესში, ამიტომ ახალი ხელისუფლების პირობებში ამ კუთხით არაფერი შეცვლილა. წინა წელთან შედარებიტ 50%-ით გაიზარდა გაყიდვები.”

ნატახტარი:  ”ჩვენ კონკურენტულ ფასებს ვთავაზობთ მომხმარებელს, ლუდზე მინიმალური ფასი ერთი ლარი და 20 თეთრია, ხოლო მაქსიმალური 4 ლარი და 30 თეთრი, ფასების კლებას ან მატებას ამ სეზონზე არ ვგეგმავთ, არც სიახლეებია მოსალოდნელი. ინფორმაციას იმის შესახებ თუ რა რაოდენობის ლუდის ჩამოსხმას ვგეგმავთ სეზონზე ვერ გავასაჯაროებთ.  იმპორტირებული ლუდი დიდ კონკურენციას უწევს ადგილობრივი წარმოების ლუდს, თუმცა მთავარი კონკურენტი ბაზარზე ქართული ლუდის კომპანიებია. ნატახტარი ექსპორტს ახორცილებეს – 22 ქვეყანაში, მათ შორისაა აშშ, ბელორუსია, მოლდოვა, პოლონეთი, უკრაინა, ლიტვა, ლატვია, საბერძნეთი, ყაზახეთი, ტაჯიკეთი. ნატახტარი გეგმავს კიდევ უფრო გაზარდოს საზღვარგარეთ ბაზარი. ახალი ხელისუფლების პირობებში ბიზნესისი კეთების კუთხით გარემო არ შეცვლილა, გაყიდვებმა კი მნიშვნელოვნად იმატა.”

კასტელი: ”ლუდზე მინიმალური ფასი 1ლარი და 20 თეთრია, ხოლო  მაქსიმალური 4 ლარი და 60 თეთრი, ფასები კონკურენტებთან შედარებით დაბალია და ამ სეზონზე ცვლილება ამ კუთხით არ იგეგმება. რაც შეეხება სიახლეებს, დღეს პირველად გავიდა ბაზარზე ჩვენი ახალი ბრენდი გერმანული 9, რომელიც სხვა ნაწარმისგან განსხვავდება იმით, რომ შეიცავს დიდი დოზით ალკოჰოლს. ამ სეზონზე იგეგმება 9 მილიონი ლიტრი ლუდის ჩამოსხმა. იმპორტირებული ლუდი რა თქმა უნდა უწევს კონკურენციას ადგილობრივი წარმოების პროდუქტს, მაგრამ უმნიშვნელოდ. ქართულ ბაზარზე კონკურენციას, ძირითადად ადგილობრივი მწარმოებლები ვუქმნით ერთმანეთს, იმპორტირებული ლუდი შედარებით სხვა სეგმენტია. ახალი ხელისუფლების პირობებში გარემო ბიზნესის კეთების კუთხით არ შეცვლილა, წინა წელთან შედარებით გაყიდვები გაიზარდა. საქართველოს ლუდი სბაზარზე ჩვენს კომპანიას 17%-იანი წილი უჭირავს.”

11.04.14

ნინა პირტახია