საქართველოს ძიუდოისტთა ნაკრებმა კონტინენტის გუნდური ჩემპიონატის ფინალში რუსეთის ნაკრები დაამარცხა და ევროპის ჩემპიონობა შეინარჩუნა. შეიძლება ითქვას, საქართველოს ძიუდოისტთა ნაკრები რუსეთისთვის გადაულახავ ბარიერად იქცა.
საქართველოს ნაკრების (შალვა ქარდავა, ნუგზარ ტატალაშვილი, ავთანდილ ჭრიკიშვილი, ვარლამ ლიპარტელიანი, ადამ ოქრუაშვილი ) წყალობით რუსეთი ზედიზედ მეორედ გუნდურში ევროპის ჩემპიონატის ოქროს მედლების გარეშე რჩებიან.
გუნდური პირველობის საწყის შეხვედრაში ირაკლი უზნაძის გუნდმა ჩეხეთი დაამარცხა – შალვა ქარდავამ, ზებედა რეხვიაშვილმა, ავთანდილ ჭრიკიშვილმა, ვარლამ ლიპარტელიანმა და ლევან მატიაშვილმა მეტოქე უშანსოდ დატოვეს – 5:0.
რთული გამოდგა ნახევარფინალი. მასპინძელ საფრანგეთთან მსაჯთა მიკერძოება იგრძნობოდა. მიუხედავად ამისა, უზნაძის რჩეულმა ხუთეულმა (შალვა ქარდავა, ნუგზარ ტატალაშვილი, ავთანდილ ჭრიკიშვილი, ვარლამ ლიპარტელიანი და ადამ ოქრუაშვილი) მასპინძელ საფრანგეთს მსაჯებიანად მოუგო – 3:2.
საქართველოსა და რუსეთის დაპირისპირება 4:1 დასრულდა, მონპელიეს ევროპის ჩემპიონატი – საქართველოს ჰიმნით.
და კიდევ, ერთი დღით ადრე ევროპის ძიუდოს კავშირმა მონპელიეში გალა დაჯილდოებაზე სხვადასხვა ნომინაციაში 2013 წლის საუკეთესოები გამოავლინა. საქართველოს ძიუდოს ნაკრები 2013 წლის ევროპის საუკეთესო გუნდად დასახელდა. 2013 წლის ევროპის საუკეთესო მწვრთნელის პრიზი ვერცხლის ორდენი საქართველოს ნაკრების მწვრთნელს ირაკლი უზნაძეს გადაეცა, ხოლო ბექა ღვინიაშვილი 2013 წლის საუკეთესო ახალგაზრდა ძიუდოისტად დასახელდა.
ევროპის ძიუდოს კავშირმა 2013 წლის კონტინენტის საუკეთესო ძიუდოისტად ფრანგი ტედი რინერი დაასახელა, ხოლო საუკეთესო ქალ ძიუდოისტად კოსოვოელი მაილინდა კელმენდი.
28.04.14
Discussion about this post