“დისკრიმინაციის ყველა ფორმის აღმოფხვრის შესახებ” კანონპროექტს პარლამენტი დღეს აღარ განიხილავს. საპარლამენტო უმრვალესობის წევრთა განმარტებით, იმის გამო, რომ კანონპროექტი მეორე მოსმენისთვის პლენარული სხდომაზე გასატანად მზად არ არის, მასზე მუშაობა ხვალ ან ზეგ განახლდება.
ვიცე სპიკერ მანან კობახიძის განცხადებით, ადამიანის უფლებათა დაცვის კომიტეტი კანონპროექტზე გუშინ გვიან ღამემდე მუშაობდა, ამიტომ საბოლოო ვარიანტი დღეისთვის მზად არ არის.
“კომიტეტმა გუშინ მუშოაბა ღამის 12 საათზე დაასრულა. კანონპროექტზე მუშაობას სჭირდება გარკვეული დრო. ამიტომ დღევანდელ სხდომაზე გასატანად მზად არ არის. ჩვენ ვფიქრობთ, რომ ამ კვირაში, ხვალაც გვქონდეს სხდომა და კანონპროექტს ისევ დავუბრუნდებით”, -განაცხადა ჟურნალისტებტან მანანა კობახიძემ.
ამასთან, “დისკრიმინაციის ყველა ფორმის აღმოფხვრის შესახებ” კანონპროექტიდან ერთ-ერთი მუხლის ამოღება გადაწყდა. კერძოდ – ანტიდისკრიმინაციულ კანონპროექტში კანონის მოქმედების სფერო დაკონკრეტებული აღარ იქნება.
საუბარია პროექტის მესამე მუხლის პირველივე ნაწილზე, რომელიც ამბობს, რომ კანონით გათვალისწინებული მოთხოვნები ვრცელდება საჯარო დაწესებულებების, ფიზიკური და იურიდიული პირების ქმედებებზე ყველა სფეროში, მათ შორის, როგორებიც არის: – დასაქმებაზე ხელმისაწვდომობა და შრომითი ურთიერთობა; პროფესიული გადამზადება და ტრენინგი; სოციალური დაცვა და ჯანდაცვა; სკოლამდელი აღზრდა, განათლება, განათლებაზე ხელმისაწვდომობა და სწავლის პროცესი; მეცნიერება; კულტურული და შემოქმედებითი საქმიანობა; არჩევნები; საზოგადოებრივი და პოლიტიკური საქმიანობა; საჯარო ინფორმაცია და მედია; მართლმსაჯულება; სამართალდაცვა და სასჯელაღსრულება; თავდაცვა; საქონლისა და მომსახურების, მათ შორის სახელმწიფო სერვისების მიწოდება და მათით სარგებლობა; საზოგადებრივი ადგილებით სარგებლობა; საცხოვრისით სარგებლობა; მეწარმეობა და საბანკო საქმე; ბუნებრივი რესურსებით სარგებლობა; ტრასნპორტი და ინფრასტრუქტურა; ტურიზმი და სპორტი. კანონში აღნიშნული ჩამონათვალი აღარ იქნება.
30.04.14