საქართველოს მთავარმა პროკურატურამ “რუსთავი 2”-ის დღევანდელი განცხადების საფუძველზე გამოძიება დაიწყო. როგორც ჟურნალისტებს პროკურორმა კოკა კაციტაძემ განუცხადა, მოხდება ყველა იმ ჩანაწერის, ტექნიკური მოწყობილობის ამოღება, რომელზეც ტელეკომპანია ფიქრობს, რომ საეჭვოა.
მისივე თქმით, მოხდება ყველა იმ პირის დაკითხვა, მათ შორის “რუსთავი 2”-ის თანამშრომლების, რომლებიც ინფორმაციას ფლობენ.
“გამოძიება მიმდინარეობს საქართველოს სისხლის სამართლის კოდექსის 158-ე მუხლის საფუძველზე, რაც გულისხმობს კერძო საუბრების, კერძო კომუნიკაციის, საიდუმლოს დარღვევას. მთავარ პროკურატურაში შექმნილია საგამოძიებო ჯგუფი, რომელიც ჩაატარებს ყველა საგამოძიებო მოქმედებას და ღონისძიებას, რათა საქმეზე დადგინდეს ობიექტური ჭეშმრიტება. ამავდროულად, ჩვენ მივმართავთ “რუსთავი 2″-ის თანამშრომლებს, რომ აქტიურად ითანამშრომლონ საგამოძიებო სამსახურთან, რათა უმოკლეს დროში მოხდეს გავრცელებული ვიდეომასალის წარმომავლობის და შესაძლო დანაშაულში მონაწილე ყველა პირის გამოვლენა”, – განაცხადა კაციტაძემ.
მისივე თქმით, საგამოძიებო ჯგუფი “რუსთავი 2”-ში უკვე გასულია.
ტელეკომპანია “რუსთავი 2”-ის ხელმძღვანელობამ დღეს პრესკონფერენცია გამართა და განაცხადა, რომ აღმოჩენელია ვიდეომასალა, სადაც ნიკა გვარამიასა და ნინო შუბლაძეს საუბრებია აღბეჭდილი. ნიკა გვარამიამ ინფორმაციის წყაროდ შსს დაასახელა.
06.05.14
Discussion about this post