საქართველოს პრეზიდენტმა უკრაინის საპრეზიდენტო არჩევნებში გამარჯვებულ პეტრე პოროშენკოსგან ინაუგურაციაზე მიწვევა მიიღო. პრეზიდენტის ადმინისტრაციის ცნობით, საქართველოს პრეზიდენტი დღეს უკრაინის არჩეულ პრეზიდენტს ტელეფონით ესაუბრა და მას გამარჯვება პირადად მიულოცა. პეტრე პოროშენკოსთან საუბრისას გიორგი მარგველაშვილმა ყურადღება არჩევნების მნიშვნელობაზე გაამახვილა და აღნიშნა, რომ ეს გამარჯვება უკრაინაში სტაბილურობის მომტანი უნდა გახდეს. ქვეყნის პირველმა პირმა უკრაინელ კოლეგასთან ქართველი და უკრაინელი ხალხების ისტორიულ მეგობრობასა და კეთილმეზობლური კავშირის გაღრმავების აუცილებლობაზე ისაუბრა. როგორც გიორგი მარგველაშვილმა აღნიშნა, პროგრესული ხელმძღვანელობის ლიდერობით უკრაინა და საქართველო ერთად განაგრძობენ სვლას ევროპული ინტეგრაციის ისტორიულ გზაზე. თავის მხრივ, პეტრე პოროშენკომ საქართველოს პრეზიდენტს მილოცვისთვის მადლობა გადაუხადა და გიორგი მარგველაშვილი ინაუგურაციაზე მიიწვია. 27.05.14