ირაკლი ღარიბაშვილი: “პოლიციელის საქმე ძალიან საპატიო და დასაფასებელია”

საქართველოს პრემიერ-მინისტრმა, ირაკლი ღარიბაშვილმა პოლიციელებს პროფესიული დღეს მიულოცა. როგორც ირაკლი ღარიბაშვილმა ბათუმში, პოლიციის დღისადმი მიძღვნილ ღონისძიებზე სიტყვით გამოსვლისას განაცხადა, პროფესიულ დღეს ულოცავს ყველას – თითოეულ პოლიციელს და შინაგან საქმეთა სამინისტროს სრულ შემადგენლობას. “თქვენ ურთულეს და ამავე დროს ძალიან საპასუხისმგებლო საქმეს ემსახურებით – თქვენ იცავთ სახელმწიფოებრივ წესრიგს ქვეყანაში და დგახართ თითოეული მოქალაქის სიცოცხლისა და უსაფრთხოების სადარაჯოზე. თქვენ ხშირად საკუთარი სიცოცხლის რისკის ფასად გიწევთ თქვენი მოვალეობის შესრულება. სწორედ ამიტომ არის პოლიციელის საქმე ძალიან საპატიო და დასაფასებელი. დღეს მინდა გავიხსენო და პატივი მივაგო ჩვენს გმირ პოლიციელებს, რომლებიც სამსახურებრივი მოვალეობის შესრულებისას საქართველოს სახელმწიფოს ინტერესების დაცვას შეეწირნენ. მეგობრებო, გთხოვთ წუთიერი დუმილით პატივი მივაგოთ მათ ხსოვნას”, – განაცხადა ღარიბაშვილმა. 30.05.14