დღეს საქართველოს ფინანსთა მინისტრი, ნოდარ ხადური შეხვდა უმსხვილესი ესტონური საინვესტიციო კომპანიის „ტრიგონ კაპიტალის“ დამფუძნებელსა და აღმასრულებელ დირექტორს იოაკიმ ჰელენიუსს.
კომპანია დაინტერესებულია პირდაპირი ინვესტიციების განხორციელებით რეგიონის მასშტაბით, ისეთ სფეროებში როგორიცაა: სოფლის მეურნეობა, ენერგო სექტორი და უძრავი ქონების ბაზარი.
აღსანიშნავია, რომ სოფლის მეურნეობის სფეროში კომპანია აღმოსავლეთ ევროპაში ყველაზე მსხვილ ინვესტორს წარმოადგენს. კომპანიის აქტივები 1 მილიარდ დოლარს უტოლდება.
შეხვედრაზე ფინანსთა მინისტრმა ნოდარ ხადურმა საინვესტიციო კომპანიის წარმომადგენლებს გააცნო ქვეყნის ეკონომიკაში მიმდინარე პროცესები, მოქმედი საგადასახადო და საბაჟო კანონმდებლობა მიმდინარე სამთავრობო პროგრამები, მათ შორის, სოფლის მეურნეობის სფეროში, ის ნაბიჯები, რომელსაც მთავრობა დგამს ინვესტორების საქმიანობის ხელშეწყობისა და წახალისებისთვის.
„შეხვედრამ კიდევ ერთხელ დაადასტურა, რომ ინვესტორებისთვის ახალი ხელისუფლების ეკონომიკური პოლიტიკა მიმზიდველია. ისინი ენდობიან ქვეყნის მთავრობას და მზად არიან განახორციელონ სერიოზული, რეალური ინვესტიციები ქვეყნის ეკონომიკაში, მათ შორის სოფლის მეურნეობაში, ფასიანი ქაღალდების ბაზრის განვითარებაში,“ – განაცხადა ნოდარ ხადურმა.
„ამ ეტაპზე ჩვენი კომპანიისთვის პრიორიტეტული სფეროებია სოფლის მეურნეობა და ჰიდროენერგეტიკის სექტორი. ვფიქრობთ, რომ საქართველოში ამ დარგებში ინვესტირების კარგი შესაძლებლობებია. ჩვენი ვიზიტის ძირითადი მიზანი სწორედ ამ შესაძლებლობების დეტალური შესწავლაა. იმედი მაქვს, მომავალში კონკრეტული პროექტების განხორციელებას შევძლებთ,“ – განაცხადა კომპანია „ტრიგონ კაპიტალის“ დამფუძნებელმა იოაკიმ ჰელენიუსმა.
ესტონური საინვესტიციო კომპანიის წარმომადგენლებს მასპინძლობს საქართველოს ეროვნული საინვესტიციო სააგენტო.
24.04.13