საქართველოს საგარეო საქმეთა სამინისტრო უკრაინის აღმოსავლეთით მალაიზიის ავიახაზების კუთვნილი ბოინგ 777, რეისით ამსტერდამი – კუალა-ლუმპური ჩამოვარდნის გამო მწუხარებას გამოთქვამს.
“უმნიშვნელოვანესია უტყუარად დადგინდეს ტრაგედიის გამომწვევი მიზეზები. ამ ეტაპზე ცალსახად შეიძლება ითქვას, რომ მომხდარი ნათლად წარმოაჩენს საერთაშორისო სამართლისა და ქვეყნის კანონმდებლობის, სუვერენიტეტისა და ტერიტორიული მთლიანობის საწინააღმდეგოდ შეიარაღებული დაპირისპირების თანამდევ სავალალო შედეგებს.
საგარეო საქმეთა სამინისტრო გულითადად უსამძიმრებს ჰოლანდიის, ავსტრალიის, მალაიზიისა და ყველა იმ სახელმწიფოების მთავრობებსა და ხალხს, რომელთა მოქალაქეები იმყოფებოდნენ თვითმფრინავის ბორტზე და თანადგომას უცხადებს დაღუპულთა ოჯახებსა და ახლობლებს”, – აღნიშნულია საგარეო საქმეთა სამინისტროს განცხადებაში.
დონეცკის ოლქის დასახლებულ პუნქტ გრაბოვოში გუშინ საღამოს მალაიზიის ავიახაზების კუთვნილი “ბოინგ 777” ჩამოვარდა, რომლის ბორტზე მყოფი 280-ვე მგზავრი და ეკიპაჟის 15-ვე წევრი დაიღუპა. ავიალაინერი ამსტერდამი-კუალა-ლუმპურის რეისს ასრულებდა და 10 ათასი მეტრის სიმაღლეზე მიფრინავდა.
18.07.14