პრეზიდენტი გიორგი მარგველაშვილი აცხადებს, რომ პრემიერმინისტრსა და მინისტრთა კაბინეტის იმ წევრებს, რომლებსაც ცვლილება არ შეხებიათ, უფლებამოსილება არ უწყდებათ. პრეზიდენტი გამოეხმაურა კონსტიტუციონალისტების ნაწილის მოსაზრებას იმის შესახებ, რომ მინისტრთა კაბინეტში საკადრო ცვლილებების გამო ირაკლი ღარიბაშვილი და მთლიანად მთავრობა მოვალეობის შემსრულებლად ითვლება.
„მათ თაობაზე არის კითხვის ნიშანი-დაამტკიცებს თუ არა მათ პარლამენტი, მაგრამ ეს არ ნიშნავს, რომ მათ უფლებამოსილება აქვთ შეწყვეტილი. უბრალოდ, არსებული ვითარებიდან გამომდინარე, პარლამენტმა ან უნდა განაახლოს ის ნდობა, რომელიც თავის დროზე გამოუცხადა, ან სხვა პოზიცია უნდა დაიკავოს, მაგრამ ეს არ ნიშნავს შეწყვეტას. ნიშნავს იმას, რომ ნდობა გასაახლებელია.
არსებული ვითარება წარმოიდგინეთ: ნდობა ჰქონდა გამოხატული 20 ადამიანს, 20-დან შეიცვალა 7, მგონი უკვე 9 გამოდის. არსებულ ვითარებაში არის ეს ნდობა შენარჩუნებული თუ არა, ამაზე არც ნეგატიური პასუხი არ გვაქვს და არც პოზიტიური. ეს უნდა გამოავლინოს პარლამენტმა. ირაკლი ღარიბაშვილის სტატუსია პრემიერმინისტრი, დანარჩენი მინისტრები არიან მინისტრები.
იყო ვითარებები, რომ მინისტრებს ცალკე ეყრებოდათ კენჭი, არსებული კონსტიტუციით ეს არ არის მოდელი. მთელ მინისტრთა კაბინეტს ერთად ეყრება კენჭი“,-განმარტა პრეზიდენტმა.
ცნობისთვის, პრემიერმა დღეს თანამდებობიდან 7 მინისტრი გაათავისუფლა. საკადრო ცვლილებები 7 სამინისტროს შეეხო, ეს სამინისტროებია: სოფლის მეურნეობის სამინისტრო, სასჯელაღსრულების სამინისტრო, დევნილთა და განსახლების სამინისტრო, გარემოს დაცვის სამინისტრო, ინფრასტრუქტურის და რეგიონული განვითარების სამინისტრო, კულტურის სამინისტრო, დიასპორის საკითხებში სახელმწიფო მინისტრის აპარატი.
სასჯელაღსრულებისა და პრობაციის საკითხთა მინისტრი სოზარ სუბარი ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრის პოსტზე დავით დარახველიძეს ჩაანაცვლებს. ინფრასტრუქტურის და რეგიონული განვითარების მინისტრი ელგუჯა ხოკრიშვილი კი გარემოს დაცვის მინისტრის თანამდებობას დაიკავებს, ის ამ პოსტზე ხათუნა გოგალაძეს შეცვლის.
21.07.14
Discussion about this post