თბილისის №103 საჯარო სკოლის ტერიატორიაზე, ძველის ნაცვლად ახალი, თანამედროვე, სკოლა აშენდება. ავარიული შენობიდან მოსწავლეების დაუყოვნებლივ გამოყვანისა და ძველი შენობის დემონტაჟის თაობაზე გადაწყვეტილება, სამინისტრომ სამხარაულის ექსპერტიზის ბიუროს დასკვნის საფუძველზე მიიღო.
როგორც “თბილისი თაიმსს” განათლების სამინისტროდან აცნობეს, დემონტაჟის შემდეგ, 103-ე სკოლის ტერიტორიზე ახალი, თანამედროვე, 1000 მოსწავლეზე გათვლილი სკოლა აშენდება. აღნიშნული ინფორმაცია საქართველოს განათლებისა და მეცნიერების მინისტრმა თამარ სანიკიძემ და თბილისის მერმა დავით ნარმანიამ დღეს სკოლის ტერიტორიაზე შეკრებილ მოსახლეობას და ჟურნალისტებს პირადად აცნობეს.
სამინისტრომ, ქალაქის მერიასთან ერთად, ავარიულ მდგომარეობაში მყოფ სკოლასთან დაკავშირებით, ყველა საჭირო ღონისძიება მაქსიმალურად მოკლე დროში განახორციელა. რაც შეეხება ახალი სკოლის მშენებლობის დაწყებას, ამ მიმართულებითაც, სამინისტრო გააგრძელებს მერიასთან აქტიურ თანამშრომლებას და დემონტაჟის დასრულებისთანავე, ახალი სკოლის მშენებლობას დაიწყებს.
103-ე საჯარო სკოლის 500-მდე მოსწავლე 2013 წლის ოქტომბრიდან დროებით, თბილისის 157-ე საჯარო სკოლაში აგრძელებს სწავლას. მოსწავლეთა ტრანსპორტირებას სამინისტროს მიერ დანიშნული სასკოლო ავტობუსი ახორციელებს.
103-ე სკოლა მრავალრიცხოვან მეტრომშენის დასახლებაში მდებარეობს და ამ ტერიტორიაზე აშენებულ თანამედროვე სკოლას, ახალი კონტიგენტით შევსების დიდი პერსპექტივა აქვს.
15.08.14
Discussion about this post