18-27 აგვისტოს საზღვარგარეთ საქართველოს საკონსულო თანამდებობის პირთა ყოველწლიური შეხვედრა – კონსულარიუმი გაიმართება. ღონისძიება დღეს, 11.00 საათზე საგარეო საქმეთა სამინისტროში გაიხსნება.
კონსულარიუმის ორგანიზატორები არიან საქართველოს საგარეო საქმეთა სამინისტრო და მიგრაციის პოლიტიკის განვითარების საერთაშორისო ცენტრი (ICMPD). ღონისძიება ევროკავშირის პროექტის “მიგრაციის მართვის გაძლიერება საქართველოში” (ENIGMMA) მხარდაჭერით მიმდინარეობს.
მიგრაციის საკითხებზე ორგანიზებულ ტრეინინგს საქართველოს საგარეო საქმეთა მინისტრი მაია ფანჯიკიძე და მიგრაციის პოლიტიკის განვითრების ცენტრის დირექტორი მარტაინ პლაიმი გახსნიან. ღონისძიების დაწყებამდე გაიმართება მინისტრის შეხვედრა მიგრაციის პოლიტიკის განვითარების საერთაშორისო ცენტრის დელეგაციასთან.
კონსულარიუმის ფარგლებში განხილული იქნება მიგრაციის პროცესებთან დაკავშირებული საკითხები, მათ შორის მიგრაციის მართვის სფეროში განხორციელებული ცვლილებები, რომელიც ძალაში 1-ელი სექტემბრიდან შედის.
საკონსულო თანამდებობის პირებს მიეწოდებათ ინფორმაცია ამ მიმართულებით ახალი რეგულაციების და პროცედურების თაობაზე. კონსულარიუმის ფარგლებში გაიმართება საკონსულო თანამდებობის პირების შეხვედრები და ინფორმაციების გაცვლა სხვადასხვა სახელმწიფო უწყებების წარმომადგენლებთან. მიგრაციის საკითხებზე ორგანიზებულ ტრეინინგში მონაწილეობას მიიღებენ ფინანსთა სამინისტროს შემოსავლების სამსახურის, საქართველოს ნოტარიუსთა პალატის, სახელმწიფო სერვისების განვითარების სააგენტოსა და პერსონალური მონაცემების დაცვის ინსპექტორის აპარატის წარმომადგენლები.
კონსულარიუმის მონაწილეები ასევე შეხვდებიან მიგრაციის პოლიტიკის განვითარების საერთაშორისო ცენტრის (ICMPD) წარმომადგენლებსა და მიგრაციის სფეროში მომუშავე საერთაშორისო ექსპერტებს.
კონსულარიუმის მონაწილეები ასევე გაეცნობიან სავიზო საკითხების მართვის ელექტრონული სისტემას, რომელიც საქართველოში ევროკავშირის მისიისა და მიგრაციის საერთაშორისო ორგანიზაციის (IOM) მხარდაჭერით შეიქმნა. ელექტრონული სისტემის პრეზენტაცია ფინანსთა სამინისტროს აკადემიაში გაიმართება, აკადემიის ბაზაზევე ჩატარდება ტრეინინგები. ტრეინინგებს საგარეო საქმეთა სამინისტროს საკონსულო დეპარტამენტისა და მიგრაციის საერთაშორისო ორგანიზაციის წარმომადგენლები წარუძღვებიან.
18.08.14