საქართველოს მთავრობამ და მსოფლიო ბანკმა “რეგიონული და მუნიციპალური ინფრასტრუქტურის განვითარების მეორე პროექტის” დასაფინანსებლად 30 მილიონი ამერიკული დოლარის ოდენობის ფინანსური რესურსის გამოყოფის შესახებ ხელშეკრულება გააფორმეს.
ხელშეკრულებას ხელი ფინანსთა მინისტრმა, ნოდარ ხადურმა, მსოფლიო ბანკის რეგიონალურმა დირექტორმა სამხრეთ კავკასიაში ჰენრი კერალიმ და მუნიციპალური განვითარების ფონდის აღმასრულებელმა დირექტორმა გიორგი ამაშუკელმა მოაწერეს.
ხელშეკრულების მიხედვით, საქართველოს მთავრობა 30 მილიონ ამერიკულ დოლარს 25-წლიანი შეღავათიანი სესხის სახით მიიღებს.
პროექტის დასაფინანსებლად ასევე, შვეიცარიის განვითარებისა და თანამშრომლობის სააგენტო გრანტის სახით 5 000 000 ამერიკულ დოლარს გამოყოფს.
“ეს დაახლოებით 40 მილიონიანი პროექტია, რომლის ნაწილს, 30 მილიონ დოლარს აფინანსებს მსოფლიო ბანკი შეღავათიანი რესურსით, 2%-მდეა წლიური პროცენტი. ამავე დროს 10 წელი არის შეღავათიანი პერიოდი, 5 000 000-ს გამოყოფს შვეიცარული მხარე და დაახლოებით 7 მილიონი იქნება ქართული მხარის, მთავრობის მიერ გამოყოფილი. ეს თანხები მოხმარდება ინფრასტრუქტურის განვითარებას”, – განაცხადა ნოდარ ხადურმა.
ჰენრი კერალის განცხადებით კი, აღნიშნული დაფინანსება მუნიციპალური ინფრასტრუქტურის და ადგილობრივი თვითმმართველობების დონეზე ინსტიტუციონალურ განვითარებას მოხმარდება.
“ეს არის ასეთი სახის მეორე სესხი და ის მიმართული იქნება იმისთვის, რომ მუნიციპალიტეტებს, ადგილობრივ ხელისუფლების ორგანოებს ჰქონდეთ საშუალება განავითარონ ადგილობრივ დონეზე ინფრასტრუქტურა. საუბარია გზებზე, განათებაზე, წყალმომარაგებაზე და ა.შ. გარდა ამისა, ეს თანხა მოხმარდება ადგილობრივი თვითმმართველობის თანამშრომლების კვალიფიკაციის ამაღლებას”, – განაცხადა ჰენრი კერალიმ.
პროექტის ფარგლებში უკვე დაგეგმილია მუნიციპალური განვითარების ფონდის მიერ საქართველოს მასშტაბით რამდენიმე სოფელში გზის, წყალმომარაგების სისტემების და კანალიზაციის გამწმენდი ნაგებობის, ასევე საბავშვო ბაგა-ბაღისა და სპორტკომპლექსის რეაბილიტაცია.
როგორც მუნიციპალური განვითარების ფონდის აღმასრულებელი დირექტორი გიორგი ამაშუკელი აცხადებს, მუნიციპალიტეტებიდან პროექტები და განაცხადები უკვე შესულია.
“მნიშვნელოვან შეთანხმებას მოეწერა დღეს ხელი. პროექტების განმახორციელებელი იქნება მუნიციპალური განვითარების ფონდი. ჩვენთან უკვე შემოსულია მუნიციპალიტეტებიდან არაერთი პროექტი და განაცხადი, რომლის დაფინანსებასაც ითხოვენ და ამ პროექტის ფარგლებში წლის ბოლომდე უკვე დავიწყებთ კონკრეტული პროექტების დაფინასებას”, – განაცხადა ამაშუკელმა.
მსოფლიო ბანკის ფინანსური მხარდაჭერით მიმდინარე რეგიონალური და მუნიციპალური ინფრასტრუქტურის განვითარების პირველი პროექტი უკვე დასკვნით ფაზაშია და ქვეყნის სხვადასხვა რეგიონში წყალსადენების, კანალიზაციის სისტემებსა და ადგილობრივი გზების რეაბილიტაციას, ნაპირსამაგრი სამუშაოების განხორციელებასა და კონფლიქტის შედეგად დაზარალებული მოსახლეობის საცხოვრებელი პირობების გაუმჯობესებას ითვალისწინებს.
18.08.14
Discussion about this post