საქართველოში მაღალი ტექნოლოგიებისა და ინოვაციების განვითარების ცენტრი შეიქმნება. ტექნოლოგიური პარკი ოქროყანაში, 18 ათას კვადრატულ მეტრზე გაშენდება და მისი ძირითადი მიზანი, ცოდნაზე დაფუძნებული მცირე და საშუალო საწარმოების რაოდენობის გაზრდა და მათი განვითარება იქნება.
საქართველოში პირველი ტექნოლოგიური პარკის პრეზენტაცია დღეს, საგამოფენო ცენტრ “ექსპო ჯორჯიას” მესამე პავილიონში გაიმართა. ღონისძიებას ვიცე-პრემიერი, ეკონომიკისა და მდგრადი განვითარების მინისტრი გიორგი კვირიკაშვილი, მისი პირველი მოადგილე დიმიტრი ქუმსიშვილი და საქართველოს ინოვაციებისა და ტექნოლოგიების სააგენტოს თავმჯდომარე ირაკლი ქაშიბაძე დაესწრნენ.
როგორც გიორგი კვირიკაშვილმა აღნიშნა, მაღალი ტექნოლოგიებისა და ინოვაციების განვითარების ცენტრი პრემიერ-მინისტრის ინიციატივით აშენდება. მისივე თქმით, ტექნოლოგიური პარკი შექმნის ერთიან ეკოსისტემას ინოვაციებისა და ტექნოლოგიების მიმართულებით და ხელს შეუწყობს ქვეყანაში ინოვაციური იდეების განვითარებას.
მინისტრის განცხადებით, ტექნოლოგიური პარკი დამწყებ და პატარა კომპანიებს შესთავაზებს მათთვის აქამდე ძნელად ხელმისაწვდომ რესურსებსა და განსაკუთრებულ როლს ითამაშებს ახალი ბიზნესისა და ახალი კომპანიების შექმნაში. მისივე თქმით, ტექნოლოგიური პარკი იძლევა შესაძლებლობას საქართველოში დაფუძნდეს საერთაშორისო კომპანიების წარმომადგენლობები და მოხდეს უცხოური ინვესტიციების მოზიდვა.
“პარკის ტერიტორიაზე იმუშავებს აქსელერატორი, მაღალტექნოლოგიური კომპანიების ტრენინგ-ცენტრები და შოუ-რუმები, იმუშავებს მაღალტექნოლოგიური ინკუბატორი, სამრეწველო ინოვაციების უნივერსალური ლაბორატორია, ცო-წორკინგ ცენტრი, საკონფერენციო დარბაზი და სხვა სერვისები, რომლებიც ხელს შეუწყობს მაღალტექნოლოგიური ინდუსტრიის განვითარებას”, – აღნიშნა გიორგი კვირიკაშვილმა.
მისივე თქმით, ცენტრის საშუალებით, მცირე, საშუალო და მსხვილ ბიზნესს უახლეს ტექნოლოგიებთან ექნებათ წვდომა, ასევე ნიჭიერი ადამიანები საკუთარი იდეების კომერციალიზაციას შეძლებენ ისეთ უმსხვილეს კომპანიებში, როგორიც არის “გუგლი”, “მაიკროსოფტი”, “ჰუავეი”.
“დღეს მივემგზავრები ჩინეთში მსოფლიო ეკონომიკურ ფორუმში მონაწილეობის მისაღებად, რომლის ფარგლებშიც მექნება შეხვედრები მაღალი ტექნოლოგიების კომპანიებთან. კერძოდ, დაგეგმილი გვაქვს შეხვედრები “ჰუავეისთან” და სხვა კომპანიებთან. რა თქმა უნდა, გვექნება დღეს წარმოდგენილ ცენტრზე საუბარი, თუ როგორ ვითანამშრომლოთ მომავალში”, – აღნიშნა გიორგი კვირიკაშვილმა.
საქართველოს ინოვაციებისა და ტექნოლოგიების სააგენტოს თავმჯდომარის, ირაკლი ქაშიბაძის ინფორმაციით, წელს ტექნოპარკის პირველი შენობა გარემონტდება, შემდგომში კი სხვა ელემენტების განვითარება მოხდება.
08.09.14