საქართველოში ოფიციალური ვიზიტის ავსტრიის დელეგაცია იმყოფება. ვიზიტის ფარგლებში, საქართველოს განათლებისა და მეცნიერების სამინისტროსა და ავსტრიის რესპუბლიკის განათლებისა და ქალთა საკითხების ფედერალურ სამინისტროს შორის ურთიერთგაგების მემორანდუმი გაფორმდა, რომელსაც ხელი მინისტრის მოადგილემ ლია გიგაურმა და ავსტრიის რესპუბლიკის განათლებისა და ქალთა საკითხების ფედერალური სამინისტროს საერთაშორისო ურთიერთობებისა და კულტურის დეპარტამენტის ხელმძღვანელმა ჰანსპეტერ ჰუბერმა მოაწერეს.
მემორანდუმის თანახმად, მხარები ხელს შეუწყობენ განათლების სფეროში გამოცდილებისა გაზიარებას და ნოუ-ჰაუს ტრანსფერს საექსპორტო და პოლიტიკურ დონეებზე. განსაკუთრებული ყურადღება მიენიჭება ისეთ თემებს, როგორიცაა განათლების სისტემის სტრუქტურა და ორგანიზება, სასწავლო გეგმა (კურიკულუმი), დიდაქტიკური მასალა და ხარისხის გაუმჯობესება.
მემორანდუმის ფარგლებში, ავსტრიის საუნივერსიტეტო კოლეჯებსა და საქართველოს მასწავლებელთა გადამზადების დაწესებულებებს შორის დამყარდება პირდაპირი ურთიერთობები და თანამშრომლობა. ავსტრიული მხარე ქართველ მასწავლებლებს ყველა დონის გერმანული ენის ტრეინინგ სემინარებს შესთავაზებს. მხარეები გამოცდილებას ინტენსიურად გაუზიარებენ პროფესიული განათლების სფეროში, მათ შორის, სოფლის მეურნეობის, მეტყევეობის, მეღვინეობის და ტურიზმის სექტორებში.
სასკოლო პარტნიორობის პროგრამების მეშვეობით, მხარეები ერთმანეთს ხელს შეუწყობენ საქართველოსა და ავსტრიულ სკოლებს შორის კონტაქტების გაძლიერებასა და მრავალმხრივ სასკოლო ქსელებში მონაწილეობაში. ორივე მხარე ხელს შეუწყობს ასევე საგანმანათლებლო საკითხებზე მეორე მხარის მიერ ორგანიზებულ საერთაშორისო კონფერენციებს, შეხვედრებსა და კონკურსებში საკუთარი წარმომადგენლების მონაწილეობას.
02.10.14
Discussion about this post