საქართველოს ცენტრალურმა საარჩევნო კომისიამ პარლამენტის საარჩევნო საკითხებზე მომუშავე ინტერფრაქციულ ჯგუფს, საარჩევნო კოდექსში ცვლილებებისა და დამატებების შესახებ პროექტი წარუდგინა.
ცესკოს ინფორმაციით, პროექტი საარჩევნო კანონმდებლობაში შესატან რამდენიმე ცვლილებას და დამატებას მოიცავს, რომელთა აუცილებლობაც მიმდინარე წლის 27 აპრილის პარლამენტის შუალედური არჩევნებისას წარმოქმნილი ხარვეზების გამო გამოიკვეთა.
ცესკოს მიერ წარდგენილ დოკუმენტში ცვლილებები და დამატებები რამდენიმე მიმართულებით არის ასახული, მათ შორის წინასაარჩევნო აგიტაციასთან და ძალოვანი უწყებების საჯარო მოხელეების საარჩევნო უბანზე ან უბნის სიახლოვეს ყოფნასთან დაკავშირებით.
ცესკო-ს დოკუმენტის მიხედვით, საარჩევნო კოდექსის 45-ე მუხლს, რომელიც წინასაარჩევნო კამპანია-აგიტაციის რეგულაციებს აწესრიგებს, უნდა დაემატოს მე-10 პუნქტი და შემდეგი რედაქციით უნდა ჩამოყალიბდეს:
“დაუშვებელია და ამ კოდექსის 79-ე მუხლით გათვალისწინებულ ადმინისტრაციულ სამართალდარღვევას წარმოადგენს საქართველოს შინაგან საქმეთა და თავდაცვის სამინისტროების, პროკურატურის, დაზვერვის სამსახურისა და სახელმწიფო დაცვის სპეციალური სამსახურის საჯარო მოხელეთა საარჩევნო უბანში ან უბნის სიახლოვეს ყოფნა, გარდა ქვემოთ ჩამოთვლილისა თუ:
ა) ამ პუნქტით განსაზღვრული საჯარო მოხელეეები ახდენენ აქტიურ საარჩევნო უფლების რეალიზაციას; ბ) არიან გამოძახებულნი შესაბამისი საუბნო საარჩევნო კომისიის თავმჯდომარის მიერ; გ) მათი ყოფნა დაკავშირებულია მათ მიერ სამსახურებრივი ფუნქციების შესრულების უშუალო და გადაუდებელ აუცილებლობასთან”, – ნათქვამია ცესკო-ს მიერ ინიცირებულ კანონპროექტში.
დოკუმენტის მიხედვით ცვლილება უნდა შევიდეს საარჩევნო კოდექსის მეორე მუხლის იმ პუნქტშიც, რომელიც წინასაარჩევნო აგიტაციას განმარტავს.
აღნიშნული ცვლილების მიხედვით წინასაარჩევნო კამპანიის ნიშნებს წინასაარჩევნო ღონისძიებაზე დასწრებაც შეიცავს. მოქმედ კოდექსში კი ამავე პუნქტში წინასაარჩევნო კამპანიის ნიშნებს შეიცავს წინასაარჩევნო ღონისძიების ორგანიზებაში/ჩატარებაში მონაწილეობა, საარჩევნო მასალების შენახვა ან გავრცელება, მხარდამჭერთა სიებზე მუშაობა და პოლიტიკური პარტიების წარმომადგენლობებში ყოფნა.
07.05.13
Discussion about this post