თურქული კომპანია დაინტერესებულია საქართველოში, ტექსტილის სექტორში ინვესტიციის განხორციელებით

საქართველოში დღეს, სამდღიანი ვიზიტით თურქული კომპანიის “ჩალიკ ჰოლდინგის” წარმომადგენლები ჩამოვიდნენ.

საქართველოს ეროვნული საინვესტიციო სააგენტოს ინფორმაციით , დელეგაციას “ჩალიკ ჰოლდინგის” შვილობილი კომპანიის “ჩალიკ ტექსტილის” დირექტორი ხელმძღვანელობს.

კომპანიის ვიზიტს ორგანიზებას უწევს საქართველოს ეროვნული საინვესტიციო სააგენტო.

კომპანია დაინტერესებულია საქართველოში, ტექსტილის სექტორში ინვესტიციის განხორციელებით, კერძოდ, საუბარია დასავლეთ საქართველოში სამკერვალო საწარმოს დაფუძნებაზე, რომელიც 600-მდე ადამიანს დაასაქმებს და სხვადასხვა ევროპული ტანსაცმლის ბრენდებს მოამარაგებს.

“ჩალიკ ტექსტილის” წარმომადგენლები დაათვალიერებენ მათი საწარმოსათვის შეთავაზებულ ადგილებს აჭარის, გურიისა და იმერეთის რეგიონებში.

დელეგაციის ვიზიტის ფარგლებში, ასევე დაგეგმილია სამუშაო შეხვედრები საქართველოს ეროვნული საინვესტიციო სააგენტოს, საპარტნიორო ფონდისა და იუსტიციის სახლის წარმომადგენლებთან, სადაც პოტენციური ინვესტორები გაეცნობიან საქართველოში არსებულ საინვესტიციო გარემოს, ბიზნესის წარმოების შესაძლებლობებსა და პროცედურებს.

ცნობისთვის, “ჩალიკ ჰოლდინგი” ერთ-ერთი უმსხვილესი კომპანიაა თურქულ ბაზარზე და მისი აქტივები 6,5 მილიარდ აშშ დოლარს შეადგენს. ჰოლდინგი 15 ქვეყანის მასშტაბით ოპერირებს ისეთ სექტორებში, როგორებიცაა ენერგეტიკა, სამშენებლო, საფინანსო, ტექსტილის წარმოება, მედია და ტელეკომუნიკაცია.

08.05.13